Euro 2016: Chris Coleman yn cyhoeddi carfan Cymru

Cymru Image copyright Getty Images

Mae rheolwr Cymru Chris Coleman wedi cyhoeddi'r garfan ar gyfer gemau hollbwysig rowndiau rhagbrofol Euro 2016 yn erbyn Cyprus ac Israel.

Does dim lle yn y garfan i chwaraewr canol cae Lerpwl Joe Allen oherwydd anaf i linyn y gar, nac i amddiffynnwr Sunderland Adam Matthews wedi iddo gael ei anafu yn erbyn Caerwysg nos Fawrth.

Roedd pryder bod Gareth Bale wedi anafu ei droed yn erbyn Sporting Gijón dros y penwythnos, ond yn dilyn sgan, fe gadarnhawyd y byddai ar gael.

Mae'r amddiffynwyr James Collins a Ben Davies, a'r chwaraewr canol cae David Edwards yn dychwelyd i'r garfan ar ôl methu'r fuddugoliaeth yn erbyn Gwlad Belg oherwydd anafiadau.

Mae'r chwaraewr canol cae ifanc, Jordan Williams, yn y garfan am y tro cyntaf. Mae'r gŵr o Fangor, 19 oed, ar fenthyg i Swindon o Lerpwl ar hyn o bryd.

Mae Cymru'n arwain Grŵp B o dri phwynt a byddai buddugoliaethau yn erbyn Cyprus ac Israel yn ddigon i sicrhau lle yn rowndiau terfynol Euro 2016 yn Ffrainc.

Y garfan yn llawn

Gôl-geidwaid: Wayne Hennessey (Crystal Palace), Daniel Ward (Aberdeen, ar fenthyg o Lerpwl), Owain Fôn Williams (Inverness Caledonian Thistle);

Amddiffynwyr: Ashley Williams (Abertawe), James Chester (West Bromwich Albion), James Collins (West Ham United), Ben Davies (Tottenham Hotspur), Chris Gunter (Reading), Neil Taylor (Abertawe), Adam Henley (Blackburn Rovers), Ashley Richards (Fulham);

Canol-cae: Joe Ledley (Crystal Palace), Aaron Ramsey (Arsenal), Jordan Williams (Swindon Town, ar fenthyg o Lerpwl), Andy King (Caerlŷr), David Edwards (Wolverhampton Wanderers), Shaun MacDonald (Bournemouth);

Ymosodwyr: David Cotterill (Birmingham City), Hal Robson-Kanu (Reading), Tom Lawrence (Blackburn Rovers, ar fenthyg o Gaerlŷr), Gareth Bale (Real Madrid), Simon Church (Milton Keynes Dons), Sam Vokes (Burnley).

Straeon perthnasol