Gatland i gyhoeddi carfan Cwpan y Byd
- Cyhoeddwyd
Bydd hyfforddwr rygbi Cymru, Warren Gatland, yn enwi'r garfan derfynol ar gyfer Cwpan y Byd.
Am hanner dydd bydd enwau'r 31 o chwaraewyr yn cael eu cyhoeddi.
Eisoes mae Gatland wedi dangos ei fod yn barod i wneud penderfyniadau anodd ar ôl iddo beidio â chynnwys Richard Hibbard, James Hook a Mike Phillips yn y garfan ddiweddara.
Mae 38 o chwaraewyr yn y garfan ar hyn o bryd.
Yn dilyn y fuddugoliaeth 16-10 yn erbyn Iwerddon ddydd Sadwrn fe ddywedodd Gatland ei fod yn bwriadu enwi 17 blaenwr a 14 o olwyr yn y garfan, gan gynnwys tri bachwr a thri mewnwr.
"Mae 24-25 o chwaraewyr yn y garfan yn bendant ond mae'n rhaid i ni drafod y garfan derfynol," meddai.
"Bydd rhai chwaraewyr yn anlwcus iawn i fethu'r cyfle ond fy neges iddyn nhw yw hyn: 'Cadwch eich pen i lawr oherwydd fe fydd anafiadau yn ystod Cwpan y Byd ac fe fydd cyfleoedd i chwaraewyr ddod 'nol i'r garfan.
"Rhan anodda'r swydd yw peidio dewis rhywun, nid honna yw'r neges fwya dymunol i roi i'r chwaraewyr."
Ymhlith y dewisiadau anodd yw penderfynu tynged y chwaraewyr sydd wedi eu hanafu.
Dyw'r prop Samson Lee, na'r cefnwr Liam Williams ddim wedi chwarae ers y tymor diwethaf.
Mae'r maswr Gareth Anscombe yn dioddef o anaf i'w figwrn.
Cafodd Alun Wyn Jones a Jamie Roberts anafiadau yn ystod y gêm ddydd Sadwrn ond mae disgwyl iddyn nhw fod yn holliach.