Rhwyfwyr yn cychwyn ar daith o Wynedd i Gaerdydd
- Cyhoeddwyd
Bydd y rhwyfwyr yn gweithio mewn sifftiau, gan gwblhau rhwng 20-30 milltir y diwrnod.
Mae aelodau clwb rhwyfo o Wynedd wedi cychwyn ar daith 230 milltir yn rhwyfo cwch i lawr arfordir y gorllewin i Fae Caerdydd.
Mae Clwb Rhwyfo MYC o Borthmadog yn bwriadu cyrraedd Canolfan y Mileniwm mewn pryd ar gyfer dathliadau deng mlwyddiant y ganolfan.
Bydd y rhwyfwyr yn gweithio mewn sifftiau, gan gwblhau rhwng 20-30 milltir y diwrnod.
Maen nhw hefyd yn cario plac llechen ar gyfer y ganolfan, sydd wedi ei gymryd o Chwarel Llechwedd ym Mlaenau Ffestiniog.
Bydd y criw yn cyrraedd ar 12 Medi i gyd-fynd â dathliadau i nodi pen-blwydd y ganolfan.
Byddan nhw yn ymuno â llu o gychod fydd yn rhan o gynhyrchiad theatrig Ar Waith Ar Daith.