Reyaad Khan ac Amin yn gefndryd

Fe wnaeth Reyaad Khan ymddangos yn fideo eithafwyr Islamaidd

Mae'r BBC ar ddeall bod dau jihadydd o Brydain - gan gynnwys Reyaad Khan o Gaerdydd - a laddwyd gan awyren ddibeilot yr Awyrlu Brenhinol yn Syria yn ddau gefnder.

Mae perthnasau i Reyaad Khan yn Bangladesh wedi cadarnhau bod Khan a Ruhul Amin o Aberdeen yn perthyn i'w gilydd.

Dywedodd ewythrod Khan wrth y BBC bod y teulu wedi synnu'n fawr gyda'r newyddion ei fod wedi ymuno â'r mudiad sy'n cael ei adnabod fel IS, ac yn credu iddo gael ei gyflyru yn y DU.

Ddydd Llun diwethaf cadarnhaodd y prif weinidog David Cameron bod dau Brydeiniwr, Khan ac Amin, wedi cael eu lladd yn yr ymosodiad ar 21 Awst.

Dywedodd aelodau o deulu Khan yn Bangladesh bod gweddïau wedi eu dweud dros y ddau ddyn yn y mosg yn eu pentrefi.