Cwpan Rygbi'r Byd: Cyhoeddi'r tîm fydd yn wynebu Lloegr

Gareth Davies sydd wedi ei ddewis yn safle'r mewnwr

Mae Cymru wedi cyhoeddi'r tîm fydd yn wynebu Lloegr yng Nghwpan Rygbi'r Byd yn Twickenham ddydd Sadwrn.

Gareth Davies yw'r mewnwr ac nid yw Mike Phillips yn y 23 fydd yn herio'r hen elyn.

Tomas Francis fydd yn dechrau yn safle'r prop pen tynn, gyda Gethin Jenkins yn ben rhydd a Scott Baldwin yn fachwr.

Er bod Samson Lee wedi gwella o'r anaf i'w goes, bydd yn dechrau ar y fainc.

Williams yn holliach

Mae'r cefnwr Liam Williams wedi gwella o'i anaf yn erbyn Uruguay ac mae George North a Hallam Amos - sydd yn lle Alex Cuthbert - ar yr esgyll.

Y capten Sam Warburton fydd yn dechrau fel rhif saith gyda Dan Lydiate a Taulupe Faletau yn ymuno gydag ef yn y rheng ôl. Mae Justin Tipuric ar y fainc.

Alun Wyn Jones a Bradley Davies fydd yn yr ail-reng tra bod Jamie Roberts a Scott Williams yn safle'r canolwyr, a Dan Biggar yn faswr.

Mae Lloegr wedi gwneud tri newid i'r tîm drechodd Fiji yng ngêm agoriadol y bencampwriaeth, gyda George Ford yn symud i'r fainc ag Owen Farrell yn cymryd ei le fel maswr.

Mae anafiadau i'r canolwr Jonathan Joseph a'r wythwr Ben Morgan wedi gorfodi Stuart Lancaster i wneud dau newid arall, gyda Sam Burgess a Billy Vunipola yn eu lle yn Twickenham.

Tîm Cymru: Liam Williams; George North, Scott Williams, Jamie Roberts, Hallam Amos, Dan Biggar, Gareth Davies; Gethin Jenkins, Scott Baldwin, Tomas Francis, Bradley Davies, Alun Wyn Jones, Dan Lydiate, Sam Warburton (capten), Taulupe Faletau.

Eilyddion: Ken Owens, Aaron Jarvis, Samson Lee, Luke Charteris, Justin Tipuric, Lloyd Williams, Rhys Priestland, Alex Cuthbert.

Tîm Lloegr: Mike Brown; Anthony Watson, Brad Barritt, Sam Burgess, Jonny May, Owen Farrell, Ben Youngs; Joe Marler, Tom Youngs, Dan Cole, Geoff Parling, Courtney Lawes, Tom Wood, Chris Robshaw (capten), Billy Vunipola.

Eilyddion: Rob Webber, Mako Vunipola, Kieran Brookes, Joe Launchbury, James Haskell, Richard Wigglesworth, George Ford, Alex Goode.

Bydd llif byw arbennig o gêm Cymru v Lloegr ar Cymru Fyw o 19:30 nos Sadwrn, ac am fwy o gyffro Cwpan Rygbi'r Byd ewch i'n is-hafan.