BBC Cymru Fyw

Wedi'r fuddugoliaeth: Argyfwng anafiadau

Published
image copyrightAFP
image captionCafodd Scott Williams anaf i'w goes
Mae carfan Cymru yn wynebu argyfwng anafiadau yn dilyn y fuddugoliaeth fawr yn Twickenham nos Sadwrn.
Mae'n ymddangos na fydd Scott Williams na Hallam Amos yn medru chwarae eto yn y gystadleuaeth, ac mae amheuon am ffitrwydd Liam Williams ar ôl iddo gael ergyd i'w ben.
Cadarnhaodd hyfforddwr amddiffyn Cymru, Shaun Edwards, fod gan Scott Williams ac Amos "anafiadau tymor hir". Mae'n amheus a fydd Liam Williams yn barod i wynebu Fiji ddydd Iau.
Awgrymodd yr hyfforddwr Warren Gatland ei fod yn ystyried dewis George North fel canolwr er mwyn llenwi'r bwlch ymhlith olwyr Cymru.
image copyrightPA
image captionCafodd Liam Williams ergyd sylweddol i'w ben
Ar ôl y gêm dywedodd George North: "Os oes angen fe wna i chwarae yn y canol. Rwy'n barod i addasu."
Dywedodd Shaun Edwards na fyddai "gormod " o'r tîm wynebodd Lloegr yn cael eu gorffwyso yn erbyn Fiji.
Bydd Cymru yn cyhoeddi newidiadau i'r garfan ddydd Llun. Ymhlith yr opsiynau sy'n cael eu hystyried - galw James Hook, Gareth Anscombe neu Eli Walker yn ôl i'r garfan.
image copyrightHuw Evans Agency
image captionHallam Amos yn dathlu ar ol anaf poenus i'w ysgwydd