5 uchafbwynt Cwpan Rygbi'r Byd

Cyhoeddwyd
Ffynhonnell y llun, Getty Images

Ar drothwy rownd wyth ola' Cwpan Rygbi'r Byd 2015, Gareth Rhys Owen o dîm Y Clwb Rygbi sy'n taro golwg ar ei hoff uchafbwyntiau hyd yma:

Sut mae esbonio i'r wraig bod gwylio Samoa yn erbyn Japan bellach yn angenrheidiol?

Gyda'r gemau grwpiau wedi dod i ben, mae'r llwybr perycla o'r daith wedi ei chroesi a, mewn gwrionedd, mae'r ddau ohono ni'n derbyn y byddai'n gwylio'r wyth gêm ola' sy'n weddill yn y gystadleuaeth.

Ond beth felly yw'r uchafbwyntiau hyd yn y hyn? Diolch unwaith eto i'ch awgrymiadau ar wefannau cymdeithasol...

Ffynhonnell y llun, Getty Images

1. Japan v De Affrica. Japan, ie… JAPAN yn dewis mynd am sgrym yn erbyn pac anferthol y Springboks gan anwybyddu'r cyfle i hawlio gêm gyfartal yn erbyn De Affrica, ie... DE AFFRICA.

Roedd y cais i ennill y gêm yn un syfrdanol - sgil, aeddfedrwydd, dycnwch. Anghofiwch am Gwpan y Byd 2015, falle ma' hwn yw fy hoff ddigwyddiad erioed yn hanes y gystadleuaeth.

Dyma oedd ymateb y Gwyddelod ym mharc y cefnogwyr yng Nghaerdydd.

Disgrifiad o’r llun, Doedd Mamuka Gorgodze o Georgia ddim yn medru coelio pan gafodd ei enwi fel seren y gêm yn erbyn Seland Newydd.

2. Seren y gêm. Mae 'na hen jôc sy'n dweud na ddyle'r cyhoedd gael y cyfrifoldeb am 'neud pendefyniadau mawr. Wedi'r cyfan, y bobl wnaeth bleidleisio am (dewisiwch barti gwleidyddol amhoblogaidd yma) a phrynnu holl recordie U2.

Ond mae'r corff sy'n rhedeg y gystadleuaeth wedi penderfynu newid y drefn o ddewis seren y gêm wedi ambell i ddewis 'rhyfedd'.

Roedd y wên ar wyneb Mamuka Gorgodze o Georgia yn bictiwr pan gafodd ei enwebu yn seren y gêm wedi i'w dîm golli yn erbyn Seland Newydd, tra bod Joe Launchbury yn amlwg yn llawn embaras wrth dderbyn y wobr wedi i'r Saeson golli'n drwm yn erbyn Awstralia.

3. Cyfweliad Mike Brown wedi i Loegr golli yn erbyn Cymru. Mae nifer wedi beirniadu ymateb Brown. Credwch chi fi, dwi wedi bod mewn sefyllfaoedd llawer mwy anghyfforddus yn fy swydd.

Ffynhonnell y llun, Getty Images

4. Ymateb y genedl gyfan i gais Gareth Davies yn erbyn Lloegr. Roedd un dyn hanner noeth yn arwain y gâd...

Ffynhonnell y llun, Huw Evans picture agency

5. Cais Kurtley Beale yn erbyn Cymru yn 2012. Dyna'r cais wnaeth olygu bod Awstralia, Cymru a Lloegr yn yr un grŵp yng Nghwpan y Byd 2015.

Roedd 'na gwynion bod yr holl drefniant yn annheg ond y gwirionedd yw i ni gael tair gêm o'r safon ucha' un.

Rygbi corfforol, rygbi safonol, rygbi go iawn.

Mwy o hyn os gwelwch yn dda.

Bydd Gareth Rhys Owen yn cyflwyno rhifyn arbennig Y Clwb Rygbi, S4C, Dydd Sadwrn, 17 Hydref, 13:15.

Dilynwch De Affrica v Cymru ar lif byw BBC Cymru Fyw, 15:30.

Gwyliwch De Affrica v Cymru, S4C, am 16:00.

Gwrandewch ar Camp Lawn ar BBC Radio Cymru 14:00.