Dynes o Lanelli 'yn nerfus' yn Sharm el-Sheikh

Mae dynes o Lanelli yn dweud ei bod "yn nerfus" yn Sharm el-Sheikh ar ôl i'r DU stopio awyrennau rhag hedfan rhwng Prydain a'r maes awyr yn Yr Aifft wedi trychineb awyren dros y penwythnos.

Mae Llywodraeth y DU wedi dweud bod "posibilrwydd sylweddol" mai bom oedd achos y digwyddiad, laddodd y 224 o bobl oedd ar yr awyren i Rwsia.

Dywedodd Lesley-Ann Evans nad oedd hi wedi clywed os bydd modd iddi ddychwelyd adref ddydd Sadwrn fel oedd hi'n bwriadu.

Mae swyddogion yn gweithio gyda chwmnïau awyrennau i drefnu i ddod â thwristiaid o'r DU adref.

Mae arbenigwyr o'r DU yn asesu systemau diogelwch wedi'r digwyddiad.

'Oedi'

Roedd Ms Evans wedi wynebu oedi ym Maes Awyr Gatwick yn dilyn y drychineb ddydd Sadwrn.

"Roedden ni'n barod i fynd ar yr awyren ac fe gafodd ei gyhoeddi bod rhywbeth wedi digwydd ac y bydden ni'n wynebu oedi," meddai.

"Yn amlwg, fe aeth pawb ar y wê i geisio darganfod beth oedd wedi digwydd. Roedd pawb yn siarad am y digwyddiad ac fe gafodd ei gyhoeddi'n swyddogol yn hwyrach.

"Dyma ein tro cyntaf yn yr Aifft a ry'n ni i gyd ychydig yn nerfus."

Dywedodd y llywodraeth bod awyrennau wedi cael eu gohirio gan fod "mwy o wybodaeth wedi dod i'r amlwg".