Dynes o Gaernarfon sy'n Sharm el-Sheikh yn rhwystredig

aros
Image caption Mae teithwyr wedi wynebu oedi hir ym maes awyr Sharm el-Sheikh ers i'r awyren blymio i'r ddaear ar 31 Hydref.

Mae dynes o Gaernarfon wedi siarad am ei rhwystredigaeth o orfod aros yn Sharm el-Sheikh yn yr Aifft heb wybod pryd yn union bydd yn cael dod adref i Gymru.

Roedd Cheryl Edwards wedi cyrraedd y wlad ar 30 Hydref, ddiwrnod cyn i awyren blymio i'r ddaear ar ôl gadael maes awyr Sharm el-Sheikh gan ladd 224 o bobl oedd ar ei bwrdd, gyda'r mwyafrif yn dwristiaid o Rwsia.

Roedd Cheryl Edwards i fod i hedfan adref ar ddydd Gwener 6 Tachwedd.

Roedd yr awyren Airbus A321 yn dychwelyd i Rwsia ac fyth ers iddi ddisgyn i'r ddaear mae miloedd o ymwelwyr wedi gorfod aros yn Sharm el-Sheikh wrth i nifer o lywodraethau atal hediadau oddi yno yn gyntaf, cyn ceisio anfon awyrennau i'r Aifft yn ddiweddarach i gludo eu dinasyddion yn ôl adref.

"Amser dod adref"

Wrth siarad gyda BBC Cymru Fyw brynhawn dydd Sul, dywedodd Cheryl Edwards: "'Da ni'n teimlo'n OK ond mae'n amser i ni ddod adref rwan. 'Da ni wedi bod drwy lot fawr o wahanol deimladau - y poeni, stress, bod yn anxious am y flight adra, ac yn drist am y bobl a'u teuluoedd sydd wedi colli eu bywydau nhw.

Image copyright Cheryl Edwards / Facebook
Image caption Cheryl Edwards o Gaernarfon

"'Da ni'n teimlo fod na lot o bethau wedi cael eu cuddio oddi wrtho ni a dydyn nhw ddim yn dweud bob dim a bod yn onest. Rydan ni wedi bod yn cael gwybodaeth oddi ar y newyddion."

Ychwanegodd Miss Edwards: "Mae na bedair awyren yn hedfan yn ôl rwan hefo (cwmni teithio) Thomson rwan ac maen nhw'n gweithio eu ffordd yn ôl drwy'r bobl oedd i fod i adael ers dydd Mercher.

Gobaith

"Da ni'n cael announcement bob nos am 22:30 hefo details y rhai hynny sydd yn fflio y diwrnod wedyn felly gobeithio bydda ni gyda'r rhai yna fory.

"Mae Thomson wedi bod yn brilliant hefo ni ac wedi cadw ni wybod be sy'n digwydd trwy'r adeg ac mae na tua chwech o reps yma hefo ni. Heddiw mae na officials o'r British Embassy wedi checkio i mewn arna ni ac yn mynd o gwmpas yn siarad hefo ni.

"Mae o'n gwneud i ni deimlo'n well eu bod nhw'n meddwl am sut yr ydan ni'n teimlo," ychwanegodd.

Image copyright AP