Streic gan yrwyr Trenau Arriva Cymru wedi ei chanslo

Mae streic 48 awr gan yrwyr renau Arriva Cymru wedi cael ei chanslo yn dilyn trafodaethau munud ola' rhwng y cwmni a'r undebau.

Roedd staff i fod i weithredu ddydd Iau a dydd Gwener.

Mae aelodau undeb gweithwyr trafnidiaeth yr RMT, a'r undeb gyrwyr trenau, ASLEF, yn anhapus gyda thelerau gwaith.

Ond yn dilyn cyfarfod rhwng y ddau undeb ac Arriva ddydd Mercher, cafodd y streic ei chanslo am y tro.

Meddai llefarydd ar ran undeb yr RMT: "Yn dilyn datblygiadau pwysig mewn trafodaethau munud ola' gyda'r RMT ac ASLEF, ac ar ôl i fwrdd gweithredol yr undeb ystyried y mater yn ofalus, rydym wedi cytuno i atal y streic oedd i fod i ddechrau ar renau Arriva Cymru am hanner nos er mwyn caniatáu rhagor o drafodaethau.

"Bydd staff, felly, yn gweithio yn ôl eu harfer."

Roedd disgwyl i'r gweithredu diwydiannol effeithio ar filoedd o deithwyr ar draws Cymru.