Llofruddiaeth Pontypridd: Carchar am oes i Christopher May

Mae cyn gigydd wnaeth lofruddio dynes a thorri ei chorff yn ddarnau wedi ei ddedfrydu i garchar am oes.

Bydd Christopher May, 50, dan glo am o leiaf 28 o flynyddoedd am ladd Tracey Woodford, 47, fis Ebrill y llynedd.

Ni ddangosodd unrhyw emosiwn wrth gael ei ddedfrydu yn Llys y Goron Caerdydd.

Roedd wedi gwadu llofruddio Ms Woodford, ond fe benderfynodd y rheithgor yn unfrydol ei fod yn euog ar ôl ystyried eu dyfarniad am 55 munud.

'Creulon, caled a phenderfynol'

Dywedodd Mrs Ustus Nicola Davies bod May yn ddyn peryglus ac efallai na fyddai'n cael ei ryddhau o gwbl.

"Roedd llofruddiaeth Tracey Woodford yn greulon, caled a phenderfynol," meddai.

"Yr un nodweddion wnaeth eich cymell i dorri corff Tracey yn ddarnau a'i guddio yn fwriadol.

"Fe wnaethoch chi hyn am un rheswm, i osgoi cael eich dal am lofruddiaeth yr oeddech yn gwybod eich bod wedi cyflawni."

'Byw mewn hunllef'

Cafodd gweddillion Tracey Woodford eu darganfod ym mis Ebrill

Daeth yr heddlu o hyd i ran o gorff Ms Woodford mewn draen

Roedd rhannau o'i chorff hefyd yn ystafell ymolchi Christopher May

Mewn datganiad, dywedodd mam Ms Woodford ei bod yn "byw mewn hunllef".

Dywedodd Linda Woodford: "Mae o wedi rhwygo ein teulu yn ddarnau. Mae o wedi ein dinistrio ni."

Roedd May wedi honni ei fod yn ceisio amddiffyn ei hun, neu ei fod wedi colli rheolaeth ar noson y llofruddiaeth.

Ond dywedodd yr erlyniad bod cymhelliad rhywiol i'r ymosodiad.

Cafodd rhannau o gorff Ms Woodford eu darganfod yn fflat May, tra ei fod o hefyd wedi cuddio rhannau o amgylch tref Pontypridd.

Fe wnaeth Mrs Ustus Davies ganmol teulu Ms Woodford am eu "dewrder ac urddas" yn ystod yr achos.