BBC Cymru Fyw

Heddwas yn gwadu cael gwared â llyfrau nodiadau

Published
image copyrightWales News Service
image captionMae achos Michael Stokes a Stephen Phillips yn parhau
Mae heddwas wedi gwadu difetha ei lyfrau nodiadau wedi i'w gyd-weithiwr gael ei gyhuddo o ddwyn arian gafodd ei ddarganfod yn ystod cyrch cyffuriau yn ardal Abertawe.
Mae'r Ditectif Gwnstabl Michael Stokes, 35 oed o Lyn-nedd, yn parhau i roi tystiolaeth i'r achos yn Llys y Goron Caerdydd.
Fe ddywedodd yr erlynydd wrth y rheithgor nad oedd modd dod o hyd i lyfrau nodiadau Mr Stokes yn ei swyddfa.
Gofynnodd Peter Griffiths QC: "Wnaethoch chi gael gwared â'r llyfrau nodiadau wedi i chi glywed fod Phillips wedi ei arestio, er mwyn peidio cael eich cysylltu â throsedd?"
Meddai Mr Stokes: "Dyw hynny ddim yn wir."
Mae wedi pledio'n ddi-euog i dri chyhuddiad o ddwyn.
Mae ei gyd-ddiffynnydd, y cyn Dditectif Sarjant Stephen Phillips, 47 oed o Abertawe, wedi pledio'n ddi-euog i ddau gyhuddiad o ddwyn.
Mae'r achos yn eu herbyn yn parhau.