Achub dynes o afon Wysg

Cafodd dynes oedrannus ei chludo i'r ysbyty ar ôl iddi gael ei hachub o afon Wysg yng nghanol Casnewydd nos Wener.

Cafodd y gwasanaethau brys eu galw i ardal Kingsway tua 20:20 ar ôl adroddiadau fod dynes yn yr afon.

Fe wnaeth uned arbennig o Wasanaeth Tân ac Achub De Cymru, gan gynnwys cychod, gael eu hanfon o Falpas.

Yno hefyd roedd diffoddwyr o Faendy a Dyffryn, ynghyd â gwylwyr y glannau, yr heddlu a'r gwasanaeth ambiwlans.

Cafodd y ddynes ei chludo i Ysbyty Brenhinol Gwent, Casnewydd, am 20:45.

Does yna ddim manylion am ei chyflwr.