BBC Cymru Fyw

Cyfansoddwraig o Gymru yn ennill Grammy

Published
image copyrightGetty Images
Mae Cymraes o Bontypridd wedi cael cryn lwyddiant yng ngwobrau'r Grammys yn Los Angeles nos Lun.
Fe gafodd cân y gwnaeth Amy Wadge ei chyd-gyfansoddi gydag Ed Sheeran, 'Thinking out Loud' - ennill gwobr Cân y Flwyddyn.
Roedd y gân wedi cael ei henwebu ar gyfer gwobrau - Record y Flwyddyn, Cân y Flwyddyn a'r Perfformiad Pop Unigol gorau yn yr 58fed Noson Wobrwyo Grammy.
Fe gyfarfu Sheeran â Wadge pan oedd yn 17 mlwydd oed, ac ers hynny maent wedi ysgrifennu nifer o ganeuon gyda'i gilydd.
Roedd y gân wedi aros am 19 wythnos ar siart y 40 uchaf ym Mhrydain, cyn cyrraedd rhif un ar ddechrau mis Tachwedd 2014 - dyma ail sengl gan Sheeran i gyrraedd rhif un.
image copyrightGetty Images

Llwyddiant rhyngwladol

Mae'r sengl hefyd wedi cyrraedd y brig yn Awstralia, Iwerddon, Seland Newydd, Denmarc, Yr Iseldiroedd, Slofacia a De Affrica.
Diolchodd Sheeran i Wadge ar y llwyfan "am ysgrifennu'r gân gyda mi".
Fe ychwanegodd: "Fe wnaethom ni ei hysgrifennu ar soffa yn fy nhŷ ar ​​ôl cael cinio - roedd yn brofiad eithaf od."
Fe gafodd Cymru Fyw air gyda Wadge wedi i'r gân gael ei henwebu ar gyfer gwobr BRIT y llynedd.
Mae Wadge yn briod â'r actor Alun ap Brinley. Mae hi hefyd yn cyflwyno rhaglenni yn achlysurol ar BBC Radio Wales.