Gorymdeithiau i ddathlu Gŵyl Ddewi

Parêd Dewi Sant ym Mangor

Mae'n ymddangos fod y traddodiad o gynnal parêd i ddathlu Gŵyl Ddewi ar gynnydd wrth i bobl ymuno â gorymdeithiau mewn sawl tref dros y penwythnos.

Cafodd digwyddiadau eu cynnal ym Mangor a Bethesda ddydd Sul.

Ymunodd tua 250 â pharêd ym Mangor ar gyfer yr ail orymdaith i'w threfnu yno.

Band carnifal Bloco Sŵn yn arwain yr orymdaith ym Mangor

Yn ôl trefnwyr Parêd Dewi Sant yn nhre Caerfyrddin, fe ymunodd tua mil o bobl â'r orymdaith honno ddydd Sadwrn - y tro cyntaf i'r parêd gael ei drefnu yn y dre.

Cafodd yr orymdaith ei harwain gan y cyn-chwaraewr rygbi, Delme Thomas.

Parêd Dewi Sant yng Nghaerfyrddin

Y Cynghorydd Peter Hughes Griffiths a Delme Thomas yn arwain Parêd Gwyl Ddewi Caerfyrddin.

Cafodd gorymdeithiau eu cynnal yn Llanelli a Phwllheli ddydd Sadwrn hefyd.

Dywedodd trefnwyr Parêd Dewi Sant Pwllheli fod tua mil wedi ymuno yn y dathlu yno.

Baneri Dewi Sant yn amlwg ym mharêd Pwllheli.

Hyd yn oed tractorau'n cymryd rhan.

Bydd rhagor o orymdeithiau'n cael eu cynnal dros yr wythnos nesaf - Caerdydd, Aberystwyth a Chaernarfon yn eu plith.