Y band o Fôn, Cordia yn fuddugol yn yr Ŵyl Ban Geltaidd

Image copyright Facebook / Cordia

Image caption Cordia yn dathlu gyda'r wobr yn Carlow

Ar ôl ennill Cân i Gymru fis diwetha', mae'r grŵp o Fôn, Cordia, wedi ailadrodd y gamp yn yr Ŵyl Ban Geltaidd.

Y band ifanc ddaeth i'r brig yng nghystadleuaeth y Gân Ryngwladol Orau gyda 'Dim Ond Un' yn yr ŵyl yn Carlow, Iwerddon, nos Iau.

Dywedodd y grŵp ar eu tudalen Facebook: "Mi roedd ennill Cân i Gymru yn anhygoel, ond i ennill yn yr Ŵyl Ban Geltaidd, waw!

"'Da ni'n falch o ddod a'r wobr yn ôl i Gymru!"

Dywedodd Ffion Elin sy'n aelod o'r band mai thema'r gân yw salwch meddwl.

"Neges y gân yw bod bob amser rhywun yno sy'n medru helpu a 'da chi ddim ar eich pen eich hunain," meddai.

Image caption Ynghyd â thlws Cân i Gymru, roedd gwobr ariannol o £5,000