Cyhoeddi enw Chef de Mission Cymru yng ngemau 2018

bbc Image copyright chef de mission

Mae Gemau'r Gymanwlad Cymru wedi cyhoeddi enw'r Chef de Mission ar gyfer gemau Arfordir Aur Awstralia yn 2018.

Gydag union ddwy flynedd i fynd nes y digwyddiad, maen nhw wedi penodi'r Athro Nicola Phillips.

Daw'r cyhoeddiad ar ôl proses recriwtio ar gyfer y swydd, ac yn ôl Bwrdd Gemau'r Gymanwlad Cymru, roedd y penderfyniad o roi'r swydd i'r Athro Phillips yn unfrydol.

Mae'r Athro Phillips yn ffisiotherapydd siartredig ac wedi cael cadair bersonol yn Ysgol Gwyddorau Gofal Iechyd Prifysgol Caerdydd.

Bydd hi'n arwain tîm o athletwyr, hyfforddwyr, rheolwyr a staff i'w cefnogi yn y gemau.

'Wrth ei bodd'

Dywedodd y bwrdd fod yr Athro Phillips yn dod â "chyfoeth o brofiad i gefnogi athletwyr mewn digwyddiadau cenedlaethol a rhyngwladol".

Yn ystod ei gyrfa, mae'r Athro Phillips wedi gweithio gyda thimau codi pwysau Cymru a Phrydain, undebau rygbi proffesiynol, gemau Olympaidd a gemau'r Gymanwlad.

Mae hi hefyd yn Llywydd Ffederasiwn Rhyngwladol Therapi Chwaraeon Corfforol.

Dywedodd yr Athro Phillips ei bod "wrth ei bodd" o gael ei phenodi.

"Dwi dal methu stopio gwenu," meddai. "Mae hwn yn anrhydedd enfawr ac ni allaf aros i ddechrau ar y swydd."