BBC Cymru Fyw

Tipuric i fethu taith Cymru i Seland Newydd gydag anaf

Published
image copyrightHuw Evans picture agency
image captionCafodd Justin Tipuric ei daro'n anymwybodol yn chwarae yn erbyn Yr Eidal ar 19 Mawrth

Ni fydd blaenasgellwr y Gweilch, Justin Tipuric ar gael ar gyfer taith Cymru i Seland Newydd ym mis Mehefin oherwydd anaf.

Mae'r chwaraewr 26 oed wedi cael ei gynghori i ymlacio am dri mis ar ôl cael ei daro'n anymwybodol wrth chwarae yn erbyn Yr Eidal ar 19 Mawrth.

Dywedodd rheolwr tîm meddygol y Gweilch, Chris Towers: "Mae Justin yn gwella ar ôl y gyfergyd yn erbyn Yr Eidal.

"Ond gan ystyried ei symptomau, y cyngor yw y byddai'n well iddo gymryd ei amser cyn dychwelyd."

Mae Cymru'n chwarae tair gêm brawf yn erbyn y crysau duon rhwng 11-15 Mehefin.