Gwyddonwyr Aberystwyth i arwain astudiaeth rhewlifoedd

Bydd ymchwilwyr o Brifysgol Aberystwyth yn arwain astudiaeth i mewn i'r peryglon a achosir gan rewlifoedd yn Chile.

Mae'r tîm wedi sicrhau grant o £370,000 i edrych ar achosion ac effeithiau peryglon rhewlifol dros gyfnod o ddwy flynedd, ar y cyd ag ymchwilwyr o Brifysgol Caerwysg ac arbenigwyr yn Chile.

Bydd yr ymchwilwyr yn edrych ar y newid yn y rhewlifoedd, amlder a dosbarthiad y peryglon, gan gynnwys llifogydd, a hynny yng nghyd-destun newid yn yr hinsawdd.

Ym mis Chwefror fe gafodd rhewlif ei enwi ar ôl Neil Glasser o'r brifysgol.

Cafodd rhewlif yn yr Antarctig ei enwi ar ôl Neil Glasser o'r brifysgol

"Mae llynnoedd a gronnwyd gan rew a marian yn datblygu yn Chile wrth i rewlifoedd gilio," meddai'r Athro Glasser.

"Maen nhw'n fygythiad cynyddol i gymunedau ac isadeiledd mewn ardaloedd yn is i lawr yr afon."

Ym Mheriw, mae llifogydd o achos rhewlifoedd wedi achosi tua 32,000 o farwolaethau yn y 20fed Ganrif.