Cymro wedi marw ym Mheriw

Daeth cadarnhad bod dyn o Wrecsam oedd ar goll ym Mheriw, wedi cael ei ddarganfod yn farw.

Fe gafodd corff Harry Greaves, 29 oed, ei ddarganfod ym mynyddoedd yr Andes.

Diflannodd Mr Greaves ar ôl mynd am daith gerdded mynydd ar ei ben ei hun ar 7 Ebrill.

Mae ei deulu wedi diolch i bawb fu'n helpu chwilio amdano.

Fe roedd y teulu wedi codi dros £31,000 ar ôl apêl ar y we, a hynny ar ôl gosod targed gwreiddiol o £25,000.

Cafodd yr arian ei ddefnyddio i dalu am yr ymgyrch achub.

Cafodd Mr Greaves ei eni yn Y Waun, ger Wrecsam ond fe'i magwyd yng Nghroesoswallt, Swydd Amwythig. Bu'n fyfyriwr yng Ngholeg Iâl Wrecsam.