Gyrrwr bws yn gwadu achosi marwolaeth dyn
- Cyhoeddwyd
Mae gyrrwr bws ysgol o Sir y Fflint wedi gwadu achosi marwolaeth dyn drwy yrru'n ddiofal.
Bu farw Andrew Mark Green, 39, wedi gwrthdrawiad ym mhentref Ffynnongroyw ym mis Mehefin y llynedd.
Fe ymddangosodd Jonathon Brown, 37, o Strand Crescent, Treffynnon, yn Llys Ynadon Sir y Fflint ddydd Mawrth.
Fe blediodd yn ddieuog i'r cyhuddiad a chafodd yr achos ei yrru i Lys y Goron yr Wyddgrug ble bydd y diffynnydd yn ymddangos ddiwedd Mai.
Mae Mr Brown wedi ei gyhuddo o achosi marwolaeth Mr Green, o Fwcle, drwy yrru bws Volvo'n ddiofal ar 22 Mehefin, 2015.
Cafodd Mr Green ei hedfan i Ysbyty Prifysgol North Staffs yn Stoke gydag anaf difrifol i'w ben yn dilyn y digwyddiad tua 08:00. Bu farw ddeuddydd yn ddiweddarach.
Roedd wedi bod yn gweithio fel dyn casglu sbwriel gyda Chyngor Sir y Fflint am chwe mis, a chafodd ei ddisgrifio fel "aelod hoffus o'r tîm".