BBC Cymru Fyw

Delweddau anweddus o blant: Dau athro yn y llys

Published
image captionDyfan a Dr Robyn Wheldon-Williams yn ymddangos ger bron Llys Ynadon Caernarfon ddydd Gwener
Mae dau frawd sy'n athrawon sydd wedi eu cyhuddo o fod â delweddau anweddus o blant yn eu meddiant, ac o greu delweddau anweddus o blant wedi ymddangos yn y llys am y tro cyntaf.
Roedd Dr Robyn Wheldon-Williams yn athro yn Ysgol Syr Hugh Owen yng Nghaernarfon pan gafodd ei arestio'r llynedd.
Roedd ei frawd, Dyfan Wheldon-Williams, yn athro yn Ysgol Y Moelwyn, Blaenau Ffestiniog, pan gafodd ei arestio.
Clywodd Llys Ynadon Caernarfon fod Dr Robyn Wheldon-Williams yn wynebu wyth cyhuddiad a bod Dyfan Wheldon-Williams yn wynebu pum cyhuddiad.
Ni chafodd manylion y cyhuddiadau eu cyhoeddi yn y llys ac ni wnaeth y diffynyddion awgrymu pa ffordd y byddent yn pledio.
Clywodd y llys fod y ddau wedi eu harestio'r un pryd, wedi i warant i archwilio eu cartref ym Montnewydd ger Caernarfon gael ei gweithredu ac fe gafodd offer cyfrifiadurol ei gymryd oddi yno.
Pan gafodd y ddau eu harestio dywedodd Cyngor Gwynedd nad oedd y cyhuddiadau'n gysylltiedig â'u gwaith i'r awdurdod.
Cafodd y ddau eu rhyddhau ar fechnïaeth amodol.