Carcharu pedwar wedi ymosodiad ar deulu yng Ngwlad Thai

Ymosodiad Image copyright YouTube
Image caption Roedd tri aelod o'r teulu yn anymwybodol yn dilyn yr ymosodiad

Mae pedwar person wedi cael eu carcharu ar ôl ymosodiad ar deulu o Fro Morgannwg tra roedden nhw ar wyliau yng Ngwlad Thai, yn ôl adroddiadau.

Bu Lewis a Rosemary Owen a'u mab John Owen, o Wenfo, yn yr ysbyty ar ôl cael eu taro'n anymwybodol yn ystod dathliadau'r flwyddyn newydd yn Hua Hin fis Ebrill.

Cafodd Ms Owen, a oedd yn 65 ar y pryd, niwed i'w ymennydd a chafodd ei gŵr, 68, a'i mab, 43, bwythau wedi anafiadau i'w pennau.

Yn ôl Ms Owen, fe ddywedodd y Swyddfa Dramor wrthi fod y pedwar wnaeth ymosod ar y teulu wedi eu dedfrydu i garchar.

Bydd Suphatra Baithong a Yingyai Saengkham-in, y ddau yn 32, a Siwa Noksri a Chaiya Jaiboon, sy'n 20, yn wynebu pedair blynedd dan glo, meddai'r Bangkok Post.

Daeth manylion am yr ymosodiad i'r amlwg ar ôl i luniau CCTV ddangos ymosodwyr yn taro a chicio'r tri gael eu rhyddhau ar y we.

Mae Mr a Ms Owen wedi bod yn ymwelwyr cyson yng Ngwlad Thai ers yr 1980au.