Carchar am daflu dyn o falconi ym Mhorthcawl
Image copyright
Wales News Service
Mae dyn 22 oed wedi ei garcharu am ddwy flynedd ar ôl taflu cariad newydd ei gyn bartner oddi ar falconi.
Fe ddringodd Jack Watson o Ben-y-bont beipen law er mwyn cyrraedd fflat ei gyn gariad, Katie Edwards ym Mhorthcawl.
Clywodd Llys y Goron Caerdydd iddi fynd yn ffrwgwd, cyn i Watson daflu Christopher Williams dros ochr y balconi ar lawr cynta'r adeilad.
Roedd Miss Edwards wedi gwrthod gadael iddo fynd i mewn i'w fflat wedi iddo guro ar ei drws.
Fe alwodd hi'r heddlu, ond roedd Watson wedi dringo'r llawr cynta' i'r balconi cyn i blismyn gyrraedd.
Bygwth lladd
Dywedodd yr erlynydd David Pugh: "Roedd hi'n galw'r heddlu, a'r peth nesa' roedd hi'n wybod, roedd Watson wedi cyrraedd ei balconi ac yn nesáu at y drws agored.
Clywodd y llys i Watson ddweud ei fod yn mynd i'w lladd nhw, cyn iddo daclo Mr Williams a'i godi cyn ei ollwng oddi ar y balconi.
Erbyn i'r heddlu gyrraedd, roedd Watson yn ymosod ar Miss Edwards. Fe gafodd anafiadau i'w hwyneb ar ôl iddo'i dyrnu.
Plediodd Watson yn euog i ddau gyhuddiad o achosi anaf corfforol yn yr ymosodiad fis Mai.
Dywedodd y Barnwr Eleri Rees: "Doedd gennych chi ddim hawl mynd i mewn i'r fflat yna.
"Does gen i ddim amheuaeth eich bod yn bwriadu achosi anafiadau mwy difrifol nag y gwnaethoch chi, drwy daflu Mr Williams oddi ar y balconi."