Gemau Olympaidd Rio: Y Cymry sy'n cystadlu ddydd Mawrth
- Cyhoeddwyd
Bocsio
Enw: Joe Cordina
Camp: Bocsio pwysau ysgafn (60 cilogram) - Rownd yr 16 olaf
Dyddiad geni: 1 Rhagfyr, 1991
Man geni: Caerdydd
Anrhydeddau: Pencampwr amatur Ewrop 2015, Pencampwr Gemau'r Gymanwlad 2014
Mae'r bocsiwr 24 oed yn rhannu cyfleusterau ymarfer yng Nghasnewydd gyda nifer o enwau amlwg - Lee Selby, Fred Evans, Sean McGoldrick ac Andrew Selby.
Rygbi 7-pob-ochr
Enw: James Davies
Gemau: Prydain v Kenya; Prydain v Japan
Safle: Blaenasgellwr
Dyddiad geni: 25 Hydref, 1990
Man geni: Caerfyrddin
Anrhydeddau: Enillydd plât pencampwriaeth 7-pob-ochr Dubai 2012
Y blaenasgellwr 25 oed ydi brawd canolwr Cymru a'r Llewod, Jonathan Davies. Ei lysenw ydi 'Cubby' am mai llysenw ei frawd ydi Jon 'Fox', a hynny am fod eu rhieni yn arfer rhedeg tafarn y Fox & Hounds ym mhentref Bancyfelin.
Fe wnaeth cyn gapten tîm 7-pob-ochr Cymru greu argraff yn y Pro12 y tymor diwethaf ac roedd yn anlwcus i beidio bod yn rhan o'r garfan ar gyfer y daith i Seland Newydd ddechrau'r haf.
Enw: Sam Cross
Gemau: Prydain v Kenya; Prydain v Japan
Safle: Wythwr
Dyddiad geni: 26 Awst, 1992
Man geni: Y Fenni
Roedd yr wythwr 23 oed yn arfer chwarae pêl-droed i Went a rygbi'r gynghrair i Gymru. Mae ar gytundeb gydag Undeb Rygbi Cymru i chwarae i'r tîm 7-pob-ochr, ac mae wedi ennill 100 o gapiau.
Bu'n chwarae i Brifysgol Met Caerdydd wrth astudio ysgoloriaeth mewn gwyddor chwaraeon ac ymarfer.
Rhwyfo
Enw: Victoria Thornley
Camp: Parau rhwyfo - Rownd gynderfynol
Dyddiad geni: 30 Tachwedd, 1987
Man geni: Llanelwy
Anrhydeddau: Efydd ym Mhencampwriaethau'r Byd 2011 a Phencwmpwriaethau Ewrop 2015
Y cyn farchog a model oedd y person cyntaf i ennill medal ar ôl graddio o gynllun rhwyfo 'Cewri Chwaraeon' pan oedd hi'n fuddugol ym Mhencampwriaethau dan-23 y Byd yn 2009. Bydd hi'n rasio gyda Katherine Grainger, sy'n amddiffyn y fedal aur wnaeth hi ennill yn Llundain.
Enw: Chris Bartley
Camp: Pedwarawd pwysau ysgafn - Rownd gynderfynol
Dyddiad geni: 2 Chwefror, 1984
Man geni: Wrecsam
Anrhydeddau: Pencwmpwr y Byd 2010, medal arian yng Ngemau Olympaidd 2012
Mae'r gŵr 32 oed wedi bod yn rhan o bedwarawd Prydain ers 2009 ac roedd yn rhan o'r tîm wnaeth fethu allan ar fedal aur o lai nag eiliad yng ngemau Llundain.
Bartley, wnaeth astudio bioleg ym Mhrifysgol Nottingham, yw un o rwyfwyr mwyaf profiadol carfan Prydain.
Nofio
Enw: Ieuan Lloyd
Camp: Ras gyfnewid 4x200m dull rhydd - Rownd gyntaf a'r rownd derfynol
Dyddiad geni: 9 Gorffennaf, 1993
Man geni: Penarth
Fe wnaeth Lloyd ei ymddangosiad Olympaidd cyntaf yn Llundain ond ers hynny mae wedi cael amser gwael ohoni. Mae'n cael blwyddyn dda eleni, fodd bynnag a bydd yn rhan o ras gyfnewid 4x200m dull rhydd hefyd.