Cefnogwyr yn awyddus i weld gemau rhagbrofol Cwpan y Byd

  • Cyhoeddwyd
Wales fans applaud the team after their defeat to PortugalFfynhonnell y llun, Getty Images
Disgrifiad o’r llun,
Cefnogwyr Cymru yn cymeradwyo'r tîm wedi'r gêm yn erbyn Portiwgal yn Euro 2016

Mae 10,000 o gefnogwyr wedi prynu tocynnau ar gyfer holl gemau cartref Cymru yn y rowndiau rhagbrofol ar gyfer Cwpan y Byd yn 2018.

Bydd y tocynnau yn rhoi mynediad i'r gemau yn erbyn Moldova, Georgia, Serbia, Awstria a Gweriniaeth Iwerddon.

Fe fydd y canran olaf o'r tocynnau sydd ar gael ar gyfer Clwb Cefnogwyr Cymru yn mynd ar werth ddydd Mawrth.

Dywed Ffederasiwn Cefnogwyr Pêl-droed Cymru fod y nifer o docynnau sydd eisoes wedi eu gwerthu yn arwydd da.

Yn ôl Paul Corkery o'r Ffederasiwn, mae'r gefnogaeth yn arwydd o lwyddiant Cymru yn Euro 2016, ond hefyd gallu'r Gymdeithas Bêl-droed i gadw prisiau yn isel.

"Mae'r ffaith fod 10,000 o gefnogwyr yn prynu tocynnau ar gyfer pum gêm ymhell o flaen llaw yn hynod galonogol, yn enwedig o ystyried nad yw rhai o'r gemau yn cael eu chwarae tan y flwyddyn nesa.

Mae'r tocynnau wedi cael eu gwerthu i aelodau o Glwb Cefnogwyr Cymru yn ôl eu hawliau ymaelodi.

Fe fydd gêm gyntaf Cymru yn y rowndiau rhagbrofol yn erbyn Moldova, ar 5 Medi yn Stadiwm Dinas Caerdydd.