Pro14: Caeredin 37-10 Gweilch

Magnus Bradley Image copyright SNS
Image caption Magnus Bradley yn sicrhau sgorio i Gaeredin

Mae'r Gweilch wedi disgyn i waelod Adran A y Pro14 ar ôl colli oddi cartref yng Nghaeredin.

Fe ddechreuodd yr hanner cyntaf yn dda i'r Gweilch wrth i Dmitri Arhip sgorio cais a sicrhau trosiad hawdd i Sam Davies.

Ciciodd Jason Tovey dri phwynt i Gaeredin yn dilyn trosedd gan y Gweilch, ond o fewn munudau roedd y tîm o Gymru saith pwynt ar y blaen unwaith eto yn dilyn cic gosb lwyddiannus.

Wedi hanner awr o chwarae daeth cais i'r Albanwyr gan Blair Kinghorn, ac roedd Tovey'n llwyddiannus wrth unioni'r sgôr.

Ychwanegodd cyn-faswr y Dreigiau ddau gic arall i roi'r tîm cartref chwe phwynt ar y blaen ar yr egwyl.

Fe wnaeth cais arall, y tro hwn i Nathan Fowles, roi hwb pellach i Gaeredin ar ddechrau'r ail hanner, cyn Tovey sgorio a throsi i'w gwneud hi'n 30-10 wedi 56 munud.

Roedd yna sgôr pellach i Gaeredin ar ddiwedd y gêm wrth i Magnus Bradley sgorio cais, gyda Tovey yn trosi'n llwyddiannus unwaith eto.

Dyw'r Gweilch bellach ddim wedi ennill oddi cartref ers mis Mawrth.

Pynciau Cysylltiedig