Mark Hughes ddim eisiau swydd rheolwr Cymru

Mark Hughes Image copyright Getty Images
Image caption Mark Hughes oedd rheolwr Cymru am bum mlynedd rhwng 1999 a 2004

Mae'r BBC yn deall nad oes gan Mark Hughes ddiddordeb yn swydd rheolwr tîm cenedlaethol Cymru.

Cafodd Hughes ei ddiswyddo gan Stoke ddydd Sadwrn, tra bod Cymdeithas Bêl-droed Cymru'n cyfweld ar gyfer olynydd i Chris Coleman yr wythnos yma.

Hughes, 54, oedd rheolwr Cymru am bum mlynedd rhwng 1999 a 2004, ond dywedodd ffynonellau'n agos ato y byddai'n well ganddo reoli clwb - un ai yn Uwch Gynghrair Lloegr neu dramor.

Mae'r is-reolwr Mark Bowen hefyd wedi gadael Stoke, tra bod Cymro arall - Eddie Niedzwiecki - wedi cymryd rôl y rheolwr dros dro.

Image copyright Huw Evans picture agency
Image caption Mae Craig Bellamy, Ryan Giggs ac Osian Roberts wedi mynegi eu diddordeb yn swydd Cymru

Bydd Craig Bellamy, Ryan Giggs ac Osian Roberts yn cael eu cyfweld am swydd rheolwr y tîm cenedlaethol yn yr wythnos nesaf.

Mae'r tri wedi mynegi eu diddordeb yn y swydd ar ôl i Coleman adael am Sunderland ym mis Tachwedd.

Ond dyw hi ddim yn glir os mai'r tri enw yma'n unig sydd ar y rhestr fer.

Mae'r gymdeithas bêl-droed yn gobeithio cael olynydd i Coleman mewn lle cyn i'r enwau ddod allan o'r het ar gyfer cystadleuaeth newydd Cynghrair y Cenhedloedd ar 24 Ionawr.

Straeon perthnasol