Pryder am ffitrwydd Rhys Priestland cyn y Chwe Gwlad

Rhys Priestland i Image copyright Asiantaeth Huw Evans
Image caption Fe wnaeth Rhys Priestland ennill cap rhif 50 yn erbyn Seland Newydd fis Tachwedd

Ni fydd maswr Cymru, Rhys Priestland yn ymuno â'r garfan ryngwladol cyn Pencampwriaeth y Chwe Gwlad oherwydd anaf i linyn y gar.

Mae'n annhebygol y bydd o ar gael ar gyfer y rhan fwyaf o'r bencampwriaeth.

Cafodd maswr Caerfaddon ei anafu yn y golled yn erbyn Scarlets yng Nghwpan Pencampwyr Ewrop ddydd Gwener diwethaf.

Yn gynharach yr wythnos hon cafodd ei enwi yng ngharfan Cymru o 39, ond gwnaed y penderfyniad ar ôl iddo gael rhagor o brofion meddygol.

Yn dilyn asesiad gan ymgynghorydd meddygol dywedodd llefarydd ar ran Undeb Rygbi Cymru "y bydd Priestland yn aros gyda chlwb Caerfaddon er mwyn adfer ei ffitrwydd a bydd o ddim yn ymuno â charfan Cymru ddydd Llun".

"Mae disgwyl y bydd yr anaf yn ei rwystro rhag cymryd rhan yn y rhan fwyaf o Bencampwriaeth y Chwe Gwald."

Dyw hyfforddwr Cymru, Warren Gatland heb alw unrhyw un arall i'r garfan am y tro.

Mae pedwar chwaraewr yn y garfan sydd â'r gallu i chwarae fel maswr, sef Dan Biggar, Owen Williams, Rhys Patchell a Gareth Anscombe.

Priestland yw'r diweddaraf o chwaraewyr Cymru i ddioddef anaf cyn y bencampwriaeth.

Bydd Sam Warburton a Johathan Davies yn methu'r gystadleuaeth yn gyfan gwbl, tra bod Taulupe Faletau yn debygol o fethu'r gemau yn erbyn Yr Alban, Lloegr ac Iwerddon oherwydd anaf i'w ben-glin.