Y Bencampwriaeth: Millwall 1-1 Caerdydd

Junior Hoilett Image copyright Rex Features
Image caption Junior Hoilett yn sgorio ei ddegfed gôl y tymor hwn i Gaerdydd

Mae Caerdydd yn bedwerydd yn y tabl ac mae'r cyfle i ddringo heibio Aston Villa i'r trydydd safle wedi ei golli wedi gêm gyfartal yn erbyn Millwall.

Dechreuodd Caerdydd fel petaent ar dân.

Cafodd Junior Hoilett afael ar y bêl ar ymyl y blwch cosbi ar ôl tair munud.

Roedd e ryw bum llath ar hugain o'r gôl ac ergydiodd yn hyfryd heibio'r gôl geidwad Jordan Archer i gongl chwith y rhwyd gan roi yr adar gleision ar y blaen.

Gan Gaerdydd oedd y llaw uchaf am gyfnod maith wedyn.

Ond yn araf yr oedd Millwall yn dod yn ôl i ganol y gêm a gyda pum munud yn weddill o'r hanner cyntaf fe groesodd Jed Wallace y bêl i flwch cosbi Caerdydd a gydag ergyd rymus fe roddodd Lee Gregory y Llewod yn gyfartal.

Felly y daeth yr hanner cyntaf i ben gyda Millwall wedi eu hysbrydoli gan y gôl.

Er i Gaerdydd ddechrau'r ail hanner ychydig yn gryfach yn fuan iawn yr oedd Millwall yn ôl yn bygwth y gôl.

Bu'n rhaid i Neil Etheridge yn gôl Caerdydd wneud ambell arbediad da i gadw'r sgôr yn gyfartal.

Ond roedd y naill dîm a'r llall yn colli'r meddiant yn rhwydd a'r gêm felly yn pendilio'n gyson.

Gorfoleddu'n ofer

Roedd cefnogwyr Caerdydd yn gorfoleddu pan blannodd Sol Bamba y bêl yn y rhwyd. Ond roedd y chwiban wedi mynd ac yr oedd y sgôr yn parhau yn gyfartal.

Daeth Caerdydd yn agos eto dair munud o'r diwedd ond roedd pen amddiffynwr Millwall yn y ffordd ar linell y gôl.

Fe barhaodd y brwydro am bedair munud heibio'r naw deg ond cyfartal oedd hi yn y diwedd.

Mae Caerdydd felly yn bedwerydd yn y tabl a'r cyfle i ddringo heibio Aston Villa i'r trydydd safle wedi ei golli.