Keira Bevan a Jaz Joyce yn ôl i dîm merched Cymru

Jaz Joyce Image copyright Huw Evans picture agency
Image caption Bydd Jaz Joyce yn Awstralia ar gyfer Gemau'r Gymanwlad fis nesaf

Mae'r mewnwr Keira Bevan a'r asgellwr Jaz Joyce yn dychwelyd i dîm merched Cymru i herio'r Eidal yng Nghaerdydd ddydd Sul.

Mae Bevan wedi gwella o anaf i'w ffêr, tra bod Joyce wedi bod yn brysur yn paratoi gyda'r tîm saith-bob-ochr fydd yn cystadlu yng Ngemau'r Gymanwlad fis nesaf.

Mae Robyn Wilkins a Hannah Jones hefyd yn dod i mewn i'r olwyr ar gyfer y gêm yn erbyn yr Eidalwyr.

Fe wnaeth Cymru drechu'r Alban ar benwythnos cyntaf y gystadleuaeth, cyn colli i Loegr ac Iwerddon.

Bydd y gêm yn cael ei chynnal yn Stadiwm Principality ddydd Sul, cyn gêm y dynion.

Tîm Cymru

Hannah Jones, Jaz Joyce, Kerin Lake, Robyn Wilkins, Jess Kavanagh-Williams, Elinor Snowsill, Keira Bevan, Caryl Thomas, Carys Philips (c), Amy Evans, Siwan Lillicrap, Mel Clay, Alisha Butchers, Beth Lewis, Sioned Harries.

Eilyddion: Kelsey Jones, Gwenllian Pyrs, Meg York, Natalia John, Nia Elen Davies, Jade Knight, Alecs Donovan, Lisa Neumann.