Y Gleision yn trechu Caerloyw i ennill Cwpan Her Ewrop

Nid oes modd chwarae darnau sain a fideo ar eich dyfais
Yr ymateb i fuddugoliaeth y Gleision yng Nghwpan Her Ewrop

Mae'r Gleision wedi cipio Cwpan Her Ewrop wedi buddugoliaeth gyffrous o 31-30 yn erbyn Caerloyw.

Fe darodd Caerdydd yn ôl yn yr ail hanner ar ôl bod ar ei hôl hi o 14 pwynt.

Y Gleision gafodd y tri phwynt cyntaf yn Bilbao a hynny o fewn pum munud.

Ond Caerloyw oedd ar y blaen yn fuan wedyn gyda chais, wrth i gic wych gan y maswr Billy Burns ganfod yr asgellwr Henry Trinder yn y gornel.

Pwynt oedd yn gwahanu'r ddau dîm wedi 15 munud yn dilyn gôl gosb i Gaerdydd.

Image copyright Getty Images
Image caption Daeth cais i'r mewnwr Tomos Williams yn fuan yn yr ail hanner

Er hynny fe olygodd goliau cosb a chais gan Mark Atkinson fod Caerloyw ar y blaen ar ddiwedd yr hanner cyntaf o 6-20.

Fe ddaeth y cyffro yn gynnar yn yr ail hanner - cais o fewn munud i fewnwr y Gleision Tomos Williams wrth iddo ddangos ei sgiliau pêl-droed i sgorio ger y pyst.

Daeth cais arall y tro yma i Garyn Smith ar ôl 55 munud gan olygu bod y tîm o Gymru nawr ar y blaen o 23-20.

Cais yn y munudau olaf

Ond nid felly wnaeth y sgôr aros, gyda sgarmes symudol bwerus Caerloyw yn gwthio'r blaenwyr dros y llinell gais a James Hanson yn sgorio.

Ym munudau olaf y gêm daeth cais arall i'r Gleision gan Blaine Scully, ond doedd Gareth Anscombe ddim yn llwyddiannus gyda'r gic fyddai wedi gwneud y sgôr yn gyfartal.

Ond nid dyna'r diwedd, gyda Chaerloyw yn troseddu gan roi un cyfle olaf i Gaerdydd.

Roedd cic Anscombe yn llwyddiannus y tro hyn, gyda munud yn unig yn weddill o'r gêm.

Y sgôr terfynol felly oedd 31-30 i'r Gleision.

Mae'r canlyniad yn golygu mai dyma'r unig ranbarth yng Nghymru i guro Cwpan Her Ewrop, a hynny nawr am yr ail waith.

Pynciau Cysylltiedig

Straeon perthnasol