Cyfnod John Barclay gyda'r Scarlets ar ben wedi anaf

John Barclay Image copyright Huw Evans picture agency
Image caption Fe wnaeth John Barclay anafu ei sawdl yn y fuddugoliaeth dros Glasgow nos Wener

Mae'r Scarlets wedi cadarnhau fod y chwaraewr rheng-ôl John Barclay wedi gadael y rhanbarth yn dilyn anaf.

Fe wnaeth yr Albanwr, 31, anafu ei sawdl yn y fuddugoliaeth dros Glasgow nos Wener wrth i'r Scarlets sicrhau eu lle yn rownd derfynol y Pro14.

Ag yntau eisoes wedi cytuno i ymuno â Chaeredin ar ddiwedd y tymor, bydd Barclay nawr yn dychwelyd i'r Alban i barhau â'i driniaeth.

Mae'n gadael y Scarlets wedi pum mlynedd yn Llanelli, a hynny ar ôl llwyddo i ennill cynghrair y Pro12 y tymor diwethaf.

Bu'n gapten ar y tîm ar sawl achlysur, gan chwarae 107 o weithiau dros y rhanbarth a sgorio 14 cais.

Mae'r Scarlets yn wynebu Leinster yn Nulyn ddydd Sadwrn gan wybod y bydd buddugoliaeth yn sicrhau eu bod yn ennill y gynghrair am yr ail flwyddyn yn olynol.

Pynciau Cysylltiedig