Cannoedd yn Amlwch i gefnogi Gruffydd Wyn Roberts

torf Amlwch
Image caption Cannoedd wedi heidio i Borth Amlwch i gefnogi Gruffydd Wyn Roberts

Mae cannoedd wedi ymgynnull ym Mhorth Amlwch ar Ynys Môn i gefnogi canwr lleol sydd yn perfformio yn ffeinal rhaglen Britain's Got Talent nos Sul.

Fe enillodd Gruffydd Wyn Roberts ei le yn y ffeinal drwy bleidlais y gwylwyr yn y rownd gyn-derfynol nos Fercher.

Image caption Y dorf yn gwylio'r sgrîn fawr
Image caption Ymhlith y dorf mae nain Gruffydd

Roedd y gynulleidfa a'r beirniaid ar eu traed ar gyfer perfformiad Gruffydd, 22 oed, oedd yn fyw ar ITV1.

Amcangyfrifir bod cannoedd o bobl wedi dod at ei gilydd ym Mhorth Amlwch nos Sul i wylio'r rhaglen ar sgrîn fawr ac i gefnogi Gruffydd.

Cafodd Gruffydd le yn y rownd gynderfynol yn wreiddiol drwy swyno'r beirniaid gyda'i berfformiad arbennig o Nessun Dorma yn y rownd gyntaf.

Os bydd yn ennill y gystadleuaeth bydd yn cael perfformio yn y Royal Variety Performance.

Image copyright ITV

Dywedodd ei frawd mawr, Osian: "Mae'r gefnogaeth mae Gruff wedi ei gael gan bobl Amlwch, pobl Ynys Môn a phobl Cymru wedi bod yn ffantastig".

"Mae'i fyd o wedi newid ar ei ben" dywedodd Osian, "a rydan ni'n ddiolchgar iawn i bawb."

Mae Cyngor Môn wedi bod yn annog pobl sy'n bwriadu teithio i Borth Amlwch i ystyried teithio ar drafnidiaeth gyhoeddus neu i rannu ceir.

Dywedodd y datganiad: "Cynghorir i osgoi gyrru drwy ardal y Porthladd gan y bydd yr ardal yn brysur ac efallai y bydd y ffordd ar gau oherwydd y nifer o bobl sy'n mynychu."

Fe fydd Gruffydd yn un o wyth act fydd yn perfformio yn ffeinal Britain's Got Talent 19:30 nos Sul ar ITV 1.

Pynciau Cysylltiedig

Straeon perthnasol