Arestio dyn ar amheuaeth o lofruddiaeth yng Nghaerdydd

Roedd Malaciah Thomas yn byw yn ardal Trebiwt

Mae'r heddlu wedi cyhoeddi fod dyn 19 oed o ardal Trelái yng Nghaerdydd wedi cael ei arestio ar amheuaeth o lofruddiaeth.

Bu farw Malaciah Thomas, 20, o Dre-biwt yn ystod oriau man fore Llun.

Cafodd swyddogion arfog eu galw i Grangetown wedi adroddiadau o "ymosodiad difrifol" ar ddyn.

Yn ôl llefarydd ar ran yr heddlu, cafodd y dyn ei drywanu "nifer o weithiau" cyn marw yn y fan a'r lle.

Mae teulu Mr Thomas yn ymwybodol o'r datblygiadau diweddara, ac maen nhw'n parhau i dderbyn cefnogaeth gan swyddogion arbenigol.

Mae'r heddlu'n parhau i apelio ar unrhyw un sydd gyda gwybodaeth am y digwyddiad i gysylltu gyda nhw.