Erlyn cwmnïau am ffrwydrad lle bu farw 4 yn Sir Benfro

Safle Purfa Olew Chevron Image copyright Other
Image caption Fe ddigwyddodd y ffrwydrad yn ystod gwaith cynnal a chadw arferol ar y safle

Mae dau gwmni yn cael eu herlyn yn dilyn digwyddiad mewn purfa olew yn Sir Benfro saith mlynedd yn ôl, lle fu farw pedwar o weithwyr.

Bydd cwmnïau Valero Energy UK Limited a B&A Contracts yn wynebu cyhuddiadau yn ymwneud â'r Ddeddf Iechyd a Diogelwch yn y Gwaith.

Bu farw Julie Jones, 54, Andrew Jenkins, 33, Dennis Riley, 52, a Robert Broome, 48 yn dilyn ffrwydrad ym mhurfa Penfro ym Mehefin 2011.

Bydd y diffynyddion yn ymddangos yn Llys Ynadon Hwlffordd ar 24 Medi.

Dywedodd Dirprwy Gyfarwyddwr Yr Awdurdod Gweithredol Iechyd a Diogelwch, Jane Lassey: "Yn dilyn ymchwiliad trylwyr a hynod o fanwl, rhannau mawr o hynny ar y cyd gyda Heddlu Dyfed-Powys, rydym wedi dod i'r casgliad fod digon o dystiolaeth i ddod ag achos troseddol".

Roedd y safle dan berchnogaeth cwmni Chevron cyn cael ei werthu yn Awst 2011.

Straeon perthnasol