Arestio ail ddyn yn dilyn llofruddiaeth yng Nghaerdydd

Malachi Thomas Image copyright Heddlu De Cymru
Image caption Roedd Malaciah Thomas yn byw yn ardal Trebiwt

Mae ail ddyn wedi cael ei arestio ar amheuaeth o lofruddio Malaciah Thomas.

Cafodd dyn 29 oed o Gaerdydd ei arestio ym Maidstone gan Heddlu Caint ar ran Heddlu De Cymru.

Fe gafodd yr heddlu eu galw i adroddiadau o ymosodiad difrifol mewn gardd eiddo ar Ffordd Corporation yn ardal Grangetown ychydig cyn 02:00 fore Llun.

Fe ddaethon nhw o hyd i Mr Thomas, 20 oed o Dre-biwt, wedi cael ei drywanu sawl gwaith. Bu farw yn y fan a'r lle.

Ddydd Mercher cafodd dyn 19 oed ei arestio mewn cysylltiad â'r digwyddiad.

Mae teulu Mr Thomas yn ymwybodol o'r datblygiadau diweddaraf, ac maen nhw'n parhau i dderbyn cefnogaeth gan swyddogion arbenigol.

Mae'r heddlu'n parhau i apelio ar unrhyw un sydd gyda gwybodaeth am y digwyddiad i gysylltu gyda nhw.

Pynciau Cysylltiedig

Straeon perthnasol