Marwolaeth Ashley Talbot: Gwrandawiad yn Llys y Goron
- Cyhoeddwyd
Bydd Cyngor Pen-y-bont ar Ogwr yn wynebu gwrandawiad yn Llys y Goron am gyhuddiadau yn ymwneud â iechyd a diogelwch yn dilyn marwolaeth bachgen 15 oed yn Ysgol Uwchradd Maesteg.
Cafodd Ashley Talbot ei daro gan fws mini a oedd yn cael ei yrru gan athro ar dir yr ysgol ym mis Rhagfyr 2014.
Ni chafodd yr athro ei erlyn, ond mae'r Gweithgor Iechyd a Diogelwch wedi honni bod y cyngor wedi methu cyflawni ei ddyletswydd iechyd a diogelwch.
Cafodd ynadon yng Nghwmbrân wybod mai'r dechreubwynt ar gyfer unrhyw ddirwy bosib yw £4.2m a bod yr achos wedi cael ei anfon i Lys y Goron Casnewydd.
Clywodd y llys bod y troseddau honedig dan sylw yn dyddio o'r diwrnod agorodd yr ysgol ar 1 Medi 2008 tan y diwrnod wedi'r "ddamwain angheuol gyda'r plentyn".
Dywedodd yr erlyniad mai'r gosb uchaf posib oedd modd ei roi yn llys yn yr ynadon oedd £20,000, gan hefyd ddadlau mai "dechreubwynt" unrhyw gosb fyddai £2.4m.
Dadleuodd yr erlyniad y dylai'r achos fynd i Lys y Goron a dywedodd yr amddiffyniad nad oeddent yn gwrthwynebu hynny.
Bydd yr achos yn cael ei gyflwyno i Lys y Goron Casnewydd ar 17 Medi.