Gwerthu oriawr y pêl-droediwr Billy Meredith mewn ocsiwn

Billy Meredith Image copyright Getty Images
Image caption Fe chwaraeodd Meredith 48 o weithiau dros Gymru

Bydd oriawr un o sêr mwyaf hanes pêl-droed Cymru yn cael ei werthu yn yr haf ar ôl eistedd mewn cwpwrdd am dros hanner canrif.

Ar ôl i Sheila Stevenson, 87 oed o Cosby ger Caerlŷr, fynd ag oriawr ei mab i'w lanhau, daeth i wybod bod yr eitem yn eiddo'n wrieddiol i gyn-chwaraewr Manchester United a Manchester City, y Cymro Billy Meredith.

Roedd ysgrifen ar yr oriawr yn dweud ei fod yn anrheg i Meredith er mwyn nodi buddugoliaeth Man City yng Nghwpan FA Lloegr 1903-1904.

Dywedodd Mrs Stevenson: "Dydw i na'r mab yn ddilynwyr pêl-droed mawr. Rydyn ni'n gefnogwyr rygbi ac felly nid oedd syniad gennyn ni am ba mor arwyddocaol oedd yr oriawr."

Image copyright Hansons
Image caption Mae gan yr eitem "bwysigrwydd arbennig yn y byd chwaraeon", yn ôl Allistar Lofley

Ar ôl cael ei gadw mewn cwpwrdd am 51 o flynyddoedd wedi'r glanhau, mae Mrs Stevenson a'i mab Simon wedi penderfynu gwerthu'r eitem mewn ocsiwn.

Fe chwaraeodd Meredith, a gafodd ei eni yn Y Waun ger Wrecsam, 48 o weithiau dros Gymru a chafodd ei dderbyn i Oriel Anfarwolion Chwaraeon Cymru yn 1990.

'Cristiano Ronaldo yr oes a fu'

Cafodd yr oriawr ei roi i Mr Stevenson gan ei hen daid, Jack Reid, oedd yn ffrindiau gydag un o gyd-chwaraewyr Meredith, Samuel Cowan.

Dywedodd y prisiwr, Allistar Lofley fod gan yr oriawr "bwysigrwydd arbennig yn y byd chwaraeon".

"Mae Meredith wedi cael ei ddisgrifio fel un o sêr y cyfnod, fel Cristiano Ronaldo yr oes a fu. Fe chwaraeodd tan ei fod yn 47 ac roedd yn enwog am gnoi toothpick yn ystod gemau," meddai.

Meredith sgoriodd unig gôl y gêm ym muddugoliaeth Man City yn erbyn Bolton Wanderers yn rownd derfynol y gwpan yn 1904.

Bydd yr eitem yn cael ei werthu mewn ocsiwn yn Derby ar 22 Awst, ac mae disgwyl iddo ddenu cynigion o dros £4,000.

Pynciau Cysylltiedig