Cyhoeddi £4.3m i hyrwyddo'r Gymraeg mewn cymunedau lleol

Cymraeg
Image caption Mae'r arian yn cefnogi sefydliadau i hyrwyddo'r Gymraeg a chefnogi ffyniant yr iaith mewn cymunedau

Bydd £4.3m ar gael i hyrwyddo'r Gymraeg mewn cymunedau ledled Cymru dros y 12 mis nesaf, yn dilyn cyhoeddiad gan Lywodraeth Cymru.

Cyhoeddodd Gweinidog y Gymraeg, Eluned Morgan, fod cyfanswm o 79 o sefydliadau wedi llwyddo i sicrhau cyllid gan Lywodraeth Cymru.

Mae Urdd Gobaith Cymru, Yr Eisteddfod Genedlaethol, Merched y Wawr, Clybiau Ffermwyr Ifanc Cymru, a'r Mentrau Iaith ymhlith y sefydliadau a fydd yn derbyn cyllid.

Mae cronfa hefyd i gefnogi gwyliau cymunedol ledled Cymru ac yn parhau i ariannu 52 o bapurau bro.

Roedd yn ofynnol i'r ymgeiswyr llwyddiannus gyflwyno tystiolaeth ynghylch sut y byddan nhw'n cyfrannu at amcanion Cymraeg 2050, sef nod o sicrhau miliwn o siaradwyr Cymraeg erbyn 2050.

Wrth gyhoeddi'r cyllid, dywedodd Ms Morgan y byddai'n "cefnogi ffyniant yr iaith mewn cymunedau ledled y wlad".

"Mae'r cyllid hwn yn sicrhau ein bod yn parhau i arloesi ac adeiladu ar sail arferion a phrosiectau llwyddiannus sy'n cynnig cyfleoedd i siaradwyr Cymraeg o bob math i ddefnyddio, rhannu a mwynhau'r iaith dros y flwyddyn i ddod ac am flynyddoedd i ddod."

Y rhestr lawn o'r sefydliadau sydd wedi bod yn llwyddiannus:

  • CFFI Cymru - £124,719
  • Cymdeithas Eisteddfodau Cymru -£46,036
  • Yr Eisteddfod Genedlaethol - £603,000
  • Merched y Wawr - £110,000
  • Mentrau Iaith Cymru - £160,000
  • Urdd Gobaith Cymru - £852,184
  • Cered - £120,626
  • Hunaniaith - £192,890
  • Menter Iaith Abertawe - £102,145
  • Menter Iaith BGTM - £118,332
  • Menter Bro Ogwr - £60,000
  • Menter Caerdydd a'r Fro - £206,736
  • Menter Caerffili - £95,552
  • Menter Iaith Casnewydd - £60,000
  • Menter Iaith Castell Nedd Port Talbot - £77,415
  • Menter Iaith CNPT Cynllun Aman Tawe - £38,000
  • Menter Iaith Conwy - £105,570
  • Menter Iaith Sir Ddinbych - £81,583
  • Menter Iaith Merthyr - £60,000
  • Menter Môn - £133,060
  • Mentrau Iaith Powys - £132,591
  • Menter Iaith Rhondda Cynon Taf - £107,768
  • Menter Iaith Sir Benfro - £90,279
  • Mentrau Iaith Sir Gâr - £281,505
  • Mentrau Iaith Sir Gâr Cynllun Aman Tawe - £38,000
  • Mentrau Iaith Fflint a Wrecsam - £132,043
  • Cymdeithas Cyfieithwyr Cymru (CCC) - £50,000
  • Cronfa Papurau Bro - £97,810
  • Cronfa Gwyliau - £50,000

Straeon perthnasol