Dyfarnwr criced gafodd ei daro gan bêl wedi marw

John Williams Image copyright Western Telegraph

Mae dyfarnwr criced gafodd ei daro gan bêl yn ystod gêm yn Sir Benfro wedi marw.

Cafodd John Williams, 80, ei gludo i'r ysbyty yn dilyn y digwyddiad mewn gêm rhwng Arberth a Phenfro fis diwethaf.

Cafodd Mr Williams, o Hundleton yn Sir Benfro, ei roi mewn coma gan feddygon oherwydd difrifoldeb ei anafiadau.

Cafodd ei drin yn Ysbyty Athrofaol Cymru yng Nghaerdydd cyn i feddygon ei symud i Ysbyty Llwynhelyg yn ddiweddarach.

'Trist iawn, iawn'

Ar Twitter, dywedodd Clwb Criced Sir Benfro bod Mr Williams wedi marw gyda'i deulu wrth ei ochr.

Dywedodd y dyfarnwr arall yn ystod y gêm bod Mr Williams yn "ŵr bonheddig o safbwynt criced, ac roedd yn rhoi llawer o'i amser i'r gamp".

Ychwanegodd Robert Simons, oedd yn adnabod Mr Williams ers rhai blynyddoedd: "Mae'n drist iawn, iawn.

"Byddai holl gymuned criced Sir Benfro yn dweud yr un fath amdano. Does dim llawer ohonyn nhw o gwmpas. Dyn rhyfeddol."

Pynciau Cysylltiedig

Straeon perthnasol