Ffatri Kasai ym Merthyr i gau gan golli 180 o swyddi

Kasai
Image caption Bydd ffatri Kasai ym Merthyr Tydfil yn cau ym mis Gorffennaf 2021

Bydd ffatri sy'n cynhyrchu cydrannau ceir ym Merthyr Tudful yn cau'r flwyddyn nesaf, gyda thua 180 o swyddi'n cael eu colli.

Dywedodd Llywodraeth Cymru y bydd ffatri Kasai yn cau ym mis Gorffennaf 2021, gan ychwanegu bod hynny'n "newyddion siomedig iawn".

Ym mis Chwefror fe rybuddiodd prif weithredwr Fforwm Moduro Cymru, Tim Williams, y gallai cau ffatri Honda yn Swindon gael "effaith andwyol" ar y gadwyn gyflenwi.

Mae Kasai yn gwneud darnau ar gyfer Honda, Jaguar Land Rover a Nissan.

Mae tua 22% o werthiant y cwmni i Honda.

Mewn datganiad ar y cyd dywedodd Aelod Seneddol ac Aelod Cynulliad yr ardal - Gerald Jones a Dawn Bowden - nad oedd y newyddion yn syndod "o ystyried safle Honda yn Swindon".

Dywedodd Llywodraeth Cymru y byddai'n cynnig cefnogaeth i'r gweithlu a "pharhau i wneud popeth o fewn ein gallu i weithio ar opsiynau arall ar gyfer y safle".

Pynciau Cysylltiedig