100,000 yn tanysgrifio i wasanaeth S4C Clic dros chwe mis

llun index Image copyright BBC/S4C
Image caption Mae cyfresi fel Amdani, Bang ac Alys ar gael fel bocs sets ar S4C Clic

Mae S4C wedi cyhoeddi fod 100,000 o bobl wedi tanysgrifio i wylio eu gwasanaeth ar alw mewn ychydig dros chwe mis.

Yn flaenorol roedd S4C Clic ar gael heb yr angen am greu cyfrif personol, ond bellach mae angen i wylwyr danysgrifio i dderbyn y gwasanaeth.

Dywed S4C fod datblygu gwasanaeth tanysgrifio wedi galluogi'r sianel i gyfathrebu "un wrth un â gwylwyr ac fel canlyniad, dod i ddeall anghenion gwylwyr yn well".

Mae tanysgrifwyr yn gallu mwynhau "cynnwys ecscliwsif" gan gynnwys "bocs sets, dramâu a chynnwys penodol i ddysgwyr, plant a phobl ifanc", medd y sianel.

'Syndod mawr'

Dywedodd Prif Weithredwr S4C Owen Evans: "Mae hyn i gyd yn rhan o'n gwaith i bersonoleiddio ac ehangu ein gwasanaeth.

"Dwi eisiau ein bod ni fel sianel yn gallu cysylltu un wrth un gydag ein cynulleidfa ac ein bod ni'n eu deall a'u galluogi nhw i wylio yn gwmws beth maen nhw eisiau."

Image copyright S4C
Image caption Dywed Owen Evans ei fod wedi ei synnu fod nifer y tanysgrifwyr wedi cynyddu mor gyflym

Cafodd y cynllun tanysgrifio ei lansio yn ystod Eisteddfod yr Urdd y llynedd, ac mae Mr Evans wedi synnu ar ba mor gyflym mae Clic wedi cyrraedd y garreg filltir.

"Rydym yn falch iawn bod cymaint o wylwyr S4C wedi tanysgrifio i'r gwasanaeth Clic ac mae'r ffaith ein bod ni wedi cyrraedd 100,000 o wylwyr mewn cyfnod mor fyr yn syndod mawr i ni - ond yn newyddion da iawn.

"Mae'r niferoedd yn dangos bod S4C Clic yn lle mae pobl eisiau mynd i wylio rhaglenni a chyfresi S4C."

Yn ôl Mr Evans, mae datblygu Clic yn rhan annatod o strategaeth ddigidol y sianel.

"Fe fyddwn yn parhau i ddatblygu Clic ar gyfer y dyfodol a chynnig gwasanaeth heb ei hail i'n gwylwyr traddodiadol yn ogystal â gwylwyr newydd i'r sianel," meddai.

Straeon perthnasol

Cysylltiadau Rhyngrwyd

Dyw'r BBC ddim yn gyfrifol am safleoedd rhyngrwyd allanol.