Abertawe yn penodi Russell Martin yn brif hyfforddwr

Mae gan Martin lai nag wythnos cyn ei gêm gystadleuol gyntaf gydag Abertawe - yn erbyn Blackburn yn y Bencampwriaeth ar 7 Awst

Mae Abertawe wedi penodi Russell Martin yn brif hyfforddwr yn dilyn ymadawiad Steve Cooper.

Mae Martin, 35, wedi arwyddo cytundeb tair blynedd gyda'r Elyrch.

Y gred yw bod Abertawe wedi talu tua £400,000 mewn iawndal i MK Dons i sicrhau gwasanaethau cyn-chwaraewr rhyngwladol yr Alban.

Bydd tri aelod o'i staff hyfforddi yn MK Dons yn ymuno â Martin yn Abertawe - Luke Williams, Matt Gill a Dean Thornton, tra bydd Alan Tate yn parhau fel hyfforddwr y tîm cyntaf.

Trodd Abertawe at Martin ar ôl i is-reolwr Queens Park Rangers, John Eustace wrthod symud i Gymru y penwythnos diwethaf.

Fe wnaeth Cooper adael ei swydd yn Stadiwm Liberty ym mis Gorffennaf wedi dwy flynedd yn y rôl.

Llwyddodd i arwain y clwb i gemau ail gyfle Y Bencampwriaeth yn ei ddau dymor wrth y llyw.

Yn y cyfamser, mae MK Dons wedi cyhoeddi datganiad yn dweud pa mor "hynod siomedig" yw'r clwb ynglŷn ag amseriad ymadawiad Martin.