Gwerthu lluniau Kyffin am bron £40,000

  • Cyhoeddwyd
Fe werthodd y llun o fwthyn gwledig am £25,000Ffynhonnell y llun, Hansons
Disgrifiad o’r llun,
Fe werthodd y llun o fwthyn gwledig am £25,000

Mae darluniau gan yr artist Syr Kyffin Williams a gafodd eu canfod mewn tŷ yn Sir Stafford wedi eu gwerthu am bron £40,000.

Cafodd dau baentiad olew a dau lun mewn inc eu canfod gan arwerthwr wrth ymweld â chartref yn Burton upon Trent.

Fe werthodd y ddau lun olew am £25,000 a £14,000.

Mae Kyffin Williams yn cael ei ystyried yn un o artistiaid enwocaf Cymru, ac mae'n cael ei adnabod fwyaf am ei ddarluniau o gefn gwlad Cymru.

Mae'r lluniau a werthwyd yn cadw at yr un arddull, gydag un yn dangos bwthyn gwledig, a'r llall yn dangos tirwedd fynyddig Cymru.

Ffynhonnell y llun, Hansons
Disgrifiad o’r llun,
Gwerthodd yr ail lun am £14,000 ddydd Mawrth

Cafodd y darluniau eu gwerthu gan yr arwerthwr Charles Hanson, a ddywedodd bod y lluniau wedi dod o gartref i gyfeillion i'r artist.

"Roedd y pâr oedd wedi prynu'r lluniau yn 1961, yn uniongyrchol o stiwdio Kyffin Williams, yn ffrindiau da gyda'r artist cyn ei fod yn enwog," meddai.

"Y sôn ydy eu bod nhw'n arfer benthyg lluniau o'i stiwdio am fis neu ddau ac yna eu newid nhw am un arall."

Ychwanegodd bod y lluniau yn "ganfyddiad hollol arbennig" ac y byddai'n hoffi eu gweld yn "mynd yn ôl i Gymru".

Pynciau Cysylltiedig