Edrych 'nôl ar 20 Mehefin

A dyna ni - mae'r llif byw wedi dod i ben am y dydd. 

Fe fydd ein llif byw arferol yn dychwelyd am 08:00 yfory, ond cofiwch am ein llif byw arbennig sydd ar fin cychwyn yn dilyn yr holl gyffro yn y gêm fawr rhwng Cymru a Rwsia heno - gyda sylwebaeth ychwanegol gan Wali Tomos, Mr Picton, George Huws a Tecwyn Pari.

C'mon Cymru!!

Mae adolygiad barnwrol i benderfyniad Cyngor Sir Ddinbych i gau dwy ysgol gynradd yn y sir wedi clywed tystiolaeth gan fargyfreithiwr y cyngor.

Dywedodd Rhodri Williams QC, fod yr ymgynghoriad blaenorol wedi canolbwyntio ar gam cyntaf uno dwy ysgol gynradd, ac fe fyddai ymgynghoriad pellach yn dilyn yn y dyfodol ar y camau pellach.

Y llynedd fe bleidleisiodd y cyngor i gau Ysgol Pentrecelyn (Categori 1 - cyfrwng Cymraeg) ag Ysgol Llanfair Dyffryn Clwyd (Categori 2 - dwy ffrwd) ym mis Awst 2016.

 Yn gynharach heddiw roedd bargyfreithiwr ar ran rhieni sydd am gadw bod ymgynghoriad y cyngor yn "llawn anghysonderau".  

Fe roddodd Seland Newydd gweir i Gymru o 12-71 yn eu gêm dan 20 yn gynharach heddiw. Sgoriodd Seland Newydd 11 cais i gyd, gyda'r cynta'n dod wedi cwta 40 eiliad yn unig ym Mhencampwriaeth Ieuenctid y Byd.

Huw Evans Picture Agency

Mi fydd hi'n parhau'n sych ond yn gymylog dros nos, ac mi fydd hi’n teimlo’n glos. Fydd y tymheredd ddim yn syrthio'n is na 11C. 

Am fanylion llawn y tywydd yn eich ardal chi, ewch i wefan dywydd y BBC. 

Mae elusen Oxfam Cymru wedi galw ar bobol Cymru i groesawu ffoaduriaid drwy ysgrifennu llythyr o groeso atyn nhw, medd Golwg 360.

A hithau’n Wythnos Ffoaduriaid, mae Oxfam Cymru yn dweud eu bod eisiau sicrhau bod Cymru’n chwarae ei rhan wrth ailgartrefu ffoaduriaid.

Mae Aled Williams wedi anfon neges at Cymru Fyw o Toulouse:

"Awyrgylch wych yn ganol Toulouse cyn y gêm. Cefnogwyr Cymru yn mwynhau yr heulwen a'r awyrgylch. Edrych ymlaen i'r gêm! Dim son am unrhyw drafferth gan hwliganiaid i Rwsia."

BBC

Mae tirlithriad wedi cau ffordd yng Nghwm Tawe yn gynharach heddiw.

Cafodd y ffordd rhwng Craig Cefn Parc a Rhydaman ei chau wedi i goed a mieri ddisgyn o nant serth ac mae peirianwyr sifil yn asesu'r difrod meddai'r South Wales Evening Post.

Mae Ysgrifennydd Cymru Alun Cairns wedi galw ar gefnogwyr Cymru i beidio â theithio i Tolouse heb docyn ar gyfer y gêm fawr heno yn erbyn Rwsia.

Ychwanegodd fod ymddygiad cefnogwyr Cymru wedi bod yn wych drwy gydol y gystadleuaeth, ond bod angen iddyn nhw fod yn wyliadwrus o unrhyw drafferthion yn y ddinas.

Llun gan Carl Roberts, gohebydd BBC Cymru yn Tolouse, o rai o gefnogwyr ifanc Cymru'n edrych ymlaen at y gêm fawr heno:

Bydd rhaglen drafod Dadl Refferendwm Ewrop BBC Cymru'n cael ei darlledu nos Fercher am 20:00 ar BBC 1 Wales.

Cafodd y rhaglen ei gohirio'r wythnos diwethaf yn dilyn llofruddiaeth Jo Cox A.S.

Mae BBC Wales News yn ystyried beth mae llwyddiant Cymru yn Euro 2016 yn ei olygu i'r tîm, y cefnogwyr a'r genedl.

Mae'r rheolwr Chris Coleman eisoes wedi dweud fod gan y garfan "y potensial i fydn 'mlaen a 'mlaen" a bod "ganddyn nhw bopeth i edrych mlaen ato".

BBC

Wedi i ddau frawd oedd yn athrawon yng Ngwynedd bledio'n euog i gyhuddiadau o fod â lluniau anweddus o blant yn eu meddiant, mae Cyngor Gwynedd wedi rhyddhau datganiad.

Dywedodd llefarydd ar ran Cyngor Gwynedd: "Mae dau cyn-aelod o staff dysgu'r awdurdod wedi pledio'n euog i droseddau yn ymwneud â meddiant a chreu delweddau anweddus o blant. 

"Nid yw'r troseddau yn ymwneud â'u gwaith i'r awdurdod. Pan ddaethpwyd a'r honiadau i sylw'r Cyngor, dilynwyd holl weithdrefnau amddiffyn plant, a chafodd yr aelodau staff eu hatal o'u swyddi."

BBC

Mae adolygiad barnwrol i benderfyniad Cyngor Sir Ddinbych i gau dwy ysgol gynradd yn y sir wedi clywed bod ymgynghoriad y cyngor yn "llawn anghysonderau".

Y llynedd fe bleidleisiodd y cyngor i gau Ysgol Pentrecelyn (Categori 1 - cyfrwng Cymraeg) ag Ysgol Llanfair Dyffryn Clwyd (Categori 2 - dwy ffrwd) ym mis Awst 2016.

Byddai sefydlu ysgol newydd yn golygu addysgu'r plant yn Gymraeg neu'n Saesneg yn dibynnu ar ddewis y rhieni. Ond yn yr adolygiad barnwrol sydd yn cael ei gynnal gan yr Uchel Lys yn Llys y Goron yr Wyddgrug, dadleuodd y bargyfreithiwr ar ran rhieni sy'n gobeithio cadw Ysgol Pentrecelyn ar agor nad oedd y cyngor sir wedi ymgynghori'n gywir ar yr effaith o uno'r ddwy ysgol.

Mae disgwyl i fargyfreithiwr ar ran y cyngor sir roi tystiolaeth yn ddiweddarach heddiw.

Yr awdur a'r darlledwr Mike Parker sy'n ateb cwestiynau busneslyd Cymru Fyw yr wythnos hon. 

BBC

Mae Dewi Llwyd ymhlith cefnogwyr Cymru yn Toulouse, sy'n edrych ymlaen at y gêm!

Mae dyn wedi bod o flaen Llys y Goron Caerdydd wedi'i gyhuddo o lofruddio Lynford Brewster yn Llanedern, Caerdydd, yr wythnos ddiwetha', medd Wales Online.

Bydd Dwayne Edgar, 29, yn sefyll ei brawf fis Tachwedd.

Os na gawsoch chi gyfle i wylio'n fyw, mae cyfle i weld sesiwn holi'r sylwebydd pêl-droed Nic Parry ar dudalen Facebook Cymru Fyw.  Ymhlith y pynciau trafod, bu Nic yn dewis ei XI Cymru gorau erioed - ydych chi'n cytuno â fo?

BBC

Dim ond coch sydd i'w weld yn rhannau o ddinas Toulouse, yn ôl Elin Angharad o BBC Radio Cymru, anfonodd y llun yma at Cymru Fyw.

BBC

Mae'r enwau i gyd wedi'u tynnu allan o'r het erbyn hyn ar gyfer rownd ragbrofol gynta' Cynghrair Europa.

Bydd Llandudno'n wynebu IFK Göteborg o Sweden, gwrthwynebwyr o'r un wlad AIK Fotboll fydd gwrthwynebwyr Y Bala, tra fydd Gap Cei Conna'n cwrdd â Stabaek o Norwy.

Mae Lowri Roberts, gohebydd BBC Cymru yn Toulouse, wedi anfon y llun yma at Cymru Fyw, o gefnogwyr Rwsia yn eu gwisg draddodiadol.

BBC

Mae Wales Online yn cyfeirio at "ddigwyddiad perffaith" ar fws rhwng Casnewydd a Chwmbrân.  Mae'n ymddangos fod teithiwr wedi dweud wrth ddynes mewn gwisg niqab i "siarad Saesneg a hithau ym Mhrydain".  Ond mae'n debyg fod teithiwr arall wedi troi at y dyn gan ddweud "na, mae'n siarad Cymraeg am ei bod hi yng Nghymru".

Mae'r BBC ar ddeall y bydd Ched Evans, sy'n wynebu ail achos ar gyhuddiadau o dreisio merch, yn arwyddo gyda chlwb Chesterfield ar gytundeb blwyddyn.

Cafodd cyn ymosodwr Cymru ei garcharu yn 2012 am dreisio merch 19 oed ond cafodd ei euogfarn ei diddymu yn y Llys Apêl fis Ebrill.

BBC

Gallai gwaith ar ffordd osgoi Caernarfon i Bontnewydd gael ei ohirio am hyd at flwyddyn oherwydd pryderon am ystlumod a dyfrgwn, medd y Daily Post.

Roedd y gwaith i fod i ddechrau'n nes 'mlaen eleni, gyda'r nod o'i gwblhau erbyn diwedd 2018.

Google

Mae rheithgor yn Llys y Goron Abertawe wedi dechrau ystyried eu dyfarniad yn achos dyn sydd wedi'i gyhuddo o lofruddio'i landlord.

Mae David Ellis yn cyfadde' dynladdiad Alec Warburton ond mae'n gwadu ei lofruddio.

Cafodd corff Mr Warburton ei ddarganfod mewn hen chwarel ger Dolwyddelan ym mis Medi'r llynedd.

BBC

Mi fydd hi’n sych i’r rhan fwya' dros yr oriau nesa' - rhywfaint o heulwen, ond ambell gawod ynysig yn bosib. Bydd y tymheredd yn cyrraedd 18C a bydd lefel y paill yn uchel.

Am fanylion llawn y tywydd yn eich ardal chi, ewch i wefan dywydd y BBC.

Mae Awdurdod Tân ac Achub Gogledd Cymru wedi pleidleisio o blaid cynnal ymgynghoriad ar gynlluniau i gael gwared ar hyd at 24 o swyddi ymladdwyr tân ac un injan dân yn y gogledd.

Gallai'r cynlluniau arbed £1m o'r gyllideb ar gyfer 2019-2020. Ymysg y cynlluniau mae cael gwared ag un injan dân o orsaf Wrecsam.

Ond mae Undeb y Frigâd Dân wedi rhybuddio yn erbyn unrhyw doriadau, gan ddweud y bydden nhw'n "niweidiol" i'r gwasanaeth.

Mae un o ohebwyr BBC Cymru yn Ffrainc wedi bod yn darllen y papurau lleol...

Mae'r South Wales Evening Post yn adrodd fod nifer o gefnogwyr Cymru wedi cael trafferth cyrraedd Toulouse ar gyfer gêm grŵp ola' Cymru yn Euro 2016, wedi i awyren easyJet gael ei tharo gan fellten.

Roedden nhw i fod i hedfan allan fore ddoe ond cawson nhw wybod nos Sadwrn fod y daith wedi'i chanslo.  Mae'n debyg fod rhai cefnogwyr wedi llwyddo i ddal awyrennau eraill ond bu'n rhaid i rai dderbyn na fyddai modd teithio i Ffrainc.

Ar waetha'r glaw mawr dros yr oriau diwetha', mae Wales Online yn darogan bod gwell tywydd ar ei ffordd i Gymru dros y dyddiau nesa'.  Mae hi hefyd yn argoeli'n gynnes a braf yng Nghaerdydd heno, meddai'r wefan, wrth i gefnogwyr heidio i'r parth cefnogwyr yn y brifddinas.

BBC

Ar ôl ymchwiliad o'r llain yn Stadiwm Swalec, bydd y chwarae'n dechrau am 14:00 ar ail ddiwrnod y gêm bencampwriaeth rhwng Morgannwg a Chaint.  Roedd 'na oedi'r bore 'ma oherwydd y glaw.

Bydd y tîm cartre' yn ailddechrau 93/2.

AIK Solna o Sweden fydd gwrthwynebwyr Bala yn rownd rhagbrofol gynta' Cynghrair Europa.

Mae BBC Wales News yn adrodd hanes dau gefnogwr Cymru, wnaeth gamgymeriad wrth archebu 'stafell gwesty ar gyfer gêm Cymru yn erbyn Lloegr yn Euro 2016.  Doedden nhw - fel sawl un arall - ddim yn sylweddoli bod 'na Lens yn Y Swistir yn ogystal â Ffrainc!

Mae'n debyg bod y pâr o Bontypridd wedi gwastraffu 300 ewro - camgymeriad digon drud!

DywedFfederasiwn Cefnogwyr Pêl-droed Cymru eu bod wedi gorfod helpu nifer o gefnogwyr sy'n dilyn y tîm yn Ffrainc.

BBC

Bydd chwaraewyr Cymru'n chwarae yn eu cit coch heno, yn hytrach na'r cit llwyd a du yr oedd y chwaraewyr yn ei wisgo yn erbyn Slofacia a Lloegr.

Mae'n debyg fod cytundeb wedi bod rhwng UEFA a Chymdeithas Bêl-droed Cymru sydd yn galluogi'r Cymry i wisgo coch. Roedd na amheuaeth y byddai'r chwaraewyr mewn llwyd a du gan fod coch yn rhy debyg i liw piws chwaraewyr Rwsia.

BBC

Mae Heddlu'r Gogledd yn apelio am wybodaeth yn dilyn gwrthdrawiad ym Mlaenau Ffestiniog neithiwr pan gafodd cerddwr anafiadau difrifol.

Digwyddodd y gwrthdrawiad ar ffordd yr A496 Tanygrisiau, rhwng car VW Golf du a'r cerddwr am ychydig wedi 23:00.

Cafodd y cerddwr ei gludo mewn Ambiwlans i Ysbyty Gwynedd ym Mangor, cyn cael ei symud i Ysbyty Stoke.

Mae'r heddlu yn gofyn i unrhyw un sydd gyda gwybodaeth i gysylltu drwy ffonio 101 gan ddefnyddio'r cyfeirnod U090300.

Mae Newyddion 9 wedi bod yn holi rhai  o gefnogwyr Cymru yn Toulouse, a'r neges yw bod hi'n bryd talu'n ôl am y golled dorcalonnus i Rwsia yng ngemau rhagbrofol Euro 2004.

Roedd tua 100 eiddo yn Wrecsam heb drydan am gyfnod yn gynharach heddiw. Mae cwmni Scottish Power wedi ymddiheuro i'w cwsmeriaid gan ddweud fod nam ar un o'u ceblau tanddaearol ger Heol y Brenin yn y dref.

Cafodd y cyflenwad ei adfer erbyn 08:30.

Ar dudalen S4C, mae 'na fideo o chwaraewyr a thîm rheoli Cymru'n diolch i'r cefnogwyr am eu cefnogaeth, eu hamynedd a'u brwdfrydedd yn ystod yr ymgyrch Euro 2016...iddyn nhw mae'r diolch!

Huw Evans Picture Agency