Edrych 'nôl ar 28 Chwefror

Mae'r Press Gazette yn adrodd bod newyddiadurwyr papur newydd y Daily Post wedi darganfod bod eu swyddfa yn cau, wrth iddyn nhw dderbyn e-bost gan archfarchnad Lidl yn dweud eu bod am ailddatblygu'r safle .

Bydd staff y papur yn symud i Fae Colwyn yn hwyrach yn y flwyddyn ar ôl 16 mlynedd yn ei safle presennol yng Nghyffordd Llandudno.

Ond doedd y mwyafrif o'r gweithwyr ddim wedi cael eu gwneud yn ymwybodol eu bod yn symud, nes i'r datganiad gan Lidl gyrraedd eu desgiau.

GoogleCopyright: Google

Robin Owain Jones sydd â'r tywydd ar gyfer heno: "Bydd 'na rai cawodydd yn parhau am gyfnod wedi iddi nosi, gydag eira ar y bryniau a’r mynyddoedd, cyn troi'n noson sych ar y cyfan. 

"Bydd y gwynt yn gostegu dros nos hefyd, ac efo cyfnodau clir yn datblygu erbyn yr oriau man, bydd rhywfaint o farrug mewn mannau.

"Ond ni fydd hi mor oer â’r nosweithiau diwethaf, y tymheredd yn 2C ar ei isaf."

Am fwy o wybodaeth ewch i wefan dywydd BBC .

Mae’r Eisteddfod Genedlaethol yn cynnal cystadleuaeth eto eleni i wobrwyo cân werinol acwstig, gyda Thlws Sbardun a £500 yn wobr i’r enillydd .

Mae’r gystadleuaeth yn ddathliad o gyfraniad Alun ‘Sbardun’ Huws i fyd cerddoriaeth a llenyddiaeth Cymru fel un o gyfansoddwyr mwyaf nodedig y blynyddoedd diwethaf.

Cerddor ifanc o ardal Caernarfon, Elidyr Glyn oedd enillydd cyntaf y wobr yn Eisteddfod Genedlaethol Sir Fynwy a’r Cyffiniau y llynedd .

BBCCopyright: BBC

Mae'r henoed yng Nghymru yn wynebu amrywiaeth "sylweddol ac annerbyniol" wrth geisio gweld meddygon teulu, yn ôl y Comisiynydd Pobl Hŷn.

Dywedodd Sarah Rochira bod "pryder gwirioneddol" y gallai rhwystrau ynglŷn â gweld meddygon ychwanegu "pwysau diangen" ar rannau eraill o'r GIG.

Daw ei sylwadau mewn adroddiad, gafodd ei gyhoeddi yn dilyn ymgynghoriad naw mis.

ThinkstockCopyright: Thinkstock

Galw am gyfreithloni canabis i drin cyflwr meddygol, a ffrae Ysgol Llangennech oedd dau o'r pynciau gafodd eu trafod yn ystod sesiwn Holi'r Prif Weinidog heddiw.

Golygydd Materion Cymreig BBC Cymru, Vaughan Roderick, sy'n dadansoddi.

Yn ôl y South Wales Argus mae prop y Dreigiau, Shaun Knight, yn gadael y rhanbarth .

Fe chwaraeodd y gŵr o Gaerloyw 21 o weithiau dros y Dreigiau y tymor diwethaf, cyn ymuno dros dro gyda Chaerfaddon.

Ond mae bellach wedi arwyddo cytundeb parhaol sy'n ei gadw gyda chlwb y Recreation Ground nes diwedd 2018.

BBCCopyright: BBC

Mae dyn wedi'i garcharu am bedair blynedd a chwe mis yn Llys y Goron Caerdydd am achosi ffrwydrad yn ei gartref ei hun .

Cafodd William Flindell, 50, orchymyn hefyd gan y barnwr i gael ei drosglwyddo i ysbyty yn y 28 diwrnod nesaf.

Fe wnaeth Flindell ddioddef llosgiadau difrifol yn y digwyddiad ac achosodd gwerth £220,000 o ddifrod yn ystod y digwyddiad ym mis Ebrill y llynedd.

Heddlu GwentCopyright: Heddlu Gwent

A hithau'n Ddydd Mawrth Crempog, mae adran gylchgrawn Cymru Fyw wedi cysylltu â'r cogyddion Elliw Gwawr, Gareth Richards a Beca Lyne-Pirkis er mwyn cael ambell i syniad gwahanol am sut i ddathlu'r diwrnod mewn steil !

BBCCopyright: BBC

Mae pysgotwyr cwrwgl yng ngorllewin Cymru'n dathlu, yn ôl y Carmarthen Journal, wedi i eog sydd wedi'u dal gan bysgotwyr cwrwgl yng ngorllewin Cymru dderbyn statws bwyd arbennig gan Gomisiwn Ewrop.

Fe wnaeth rhew achosi o leiaf chwe gwrthdrawiad ar un o'r prif ffyrdd i mewn i Gaerdydd o Fro Morgannwg fore heddiw.

Dywedodd yr heddlu bod y damweiniau wedi digwydd ar rannau o'r A48, yr A4226 a'r B4270.

Mae'r ffyrdd bellach wedi cael eu graeanu.

BBCCopyright: BBC

Mae Gareth Bale ar dudalen flaen y rhifyn diweddara' o'r Radio Times yng Nghymru, ac mae'r bardd Ifor ap Glyn wedi trydar bod cyfweliad gyda'r chwaraewr byd-enwog i gyd-fynd efo rhyddhau'r ffilm Don't Take Me Home.

Mae cyfraddau ailgylchu cynghorau Cymru wedi gwella yn y flwyddyn ddiwethaf , yn ôl ffigyrau dros dro, medd BBC Wales News.

Ledled Cymru, cafodd 62% o wastraff ei ailgylchu yn y 12 mis at Medi y llynedd, o'i gymharu â 58% y flwyddyn flaenorol.

Ceredigion yw'r awdurdod sy'n perfformio orau (70%), a Blaenau Gwent oedd waethaf (52%).

Getty ImagesCopyright: Getty Images

Mae ffermwr o ardal Yr Wyddgrug wedi cael gwaharddiad rhag gofalu am anifeiliaid am chwe blynedd .

Cafodd Huw Aled Jones, 44, hefyd ddedfryd ohiriedig o 16 wythnos o garchar.

Clywodd Llys y Goron yr Wyddgrug bod gan Jones anifeiliaid oedd yn marw ar ei dir ar Fferm Ffrainc yn Rhydtalog, Sir y Fflint.

Yn ôl y Daily Post mae prifathro Ysgol Rhuthun, Toby Belfield, wedi e-bostio staff i ddweud y bydd yn chwilio am reswm i daflu 25 o ddisgyblion allan o'r ysgol breifat cyn dechrau'r flwyddyn addysgol nesaf.

Fe ddywed yr erthygl fod hyn am fod yr ysgol wedi derbyn mwy o ddisgyblion newydd nag sydd ganddyn nhw o lefydd gwag, a bod y disgyblion yna wedi talu o flaen llaw.

Bydd yr ymchwiliad cyhoeddus i gynllun i adeiladu rhan newydd o'r M4 i'r de o Gasnewydd yn clywed am argymhelliad i leoli llwybr y ffordd newydd mewn twnnel .

Ar ddiwrnod cyntaf y gwrandawiad, dywedodd yr arolygydd Bill Wadrup y byddai'r ymchwiliad cyhoeddus yn clywed am 22 llwybr posib ar wahân i'r un y mae Llywodraeth Cymru yn ei ffafrio.

Mae'r llywodraeth eisiau adeiladu ffordd chwe lôn gwerth £1.1bn rhwng Magwyr a Chas-bach i ddelio â'r tagfeydd o gwmpas twneli Brynglas.

BBCCopyright: BBC

Mae S4C wedi cael ei gyhuddo o "anffafriaeth bwriadol" am ei fethiant i gynnwys isdeitlau ar gyngerdd Bryn Terfel gafodd ei ddarlledu ar y sianel .

Cafodd Cyngerdd Gŵyl Ddewi ei ddangos ar y sianel nos Sul, ond doedd dim isdeitlau Cymraeg na Saesneg ar y caneuon.

Dywedodd y Daily Post bod ysgrifennydd Cyngor Darlledu Byddar Cymru, Cedric Moon wedi cyhuddo'r darlledwr o "anffafriaeth bwriadol" yn erbyn gwylwyr byddar.

BBCCopyright: BBC

Mae nifer y bobl ifanc sy'n cael eu lladd neu eu hanafu'n ddifrifol ar ffyrdd Cymru wedi codi 15% ers 2012.

Yn ôl yr elusen foduro Sefydliad RAC, mae gan Gymru gyfradd uwch o ddamweiniau rhwng gyrwyr ifanc nac unman arall yn y DU .

Bydd mwy ar y stori yma ar Week In Week Out: Too Young, Too Fast, Too Soon? ar BBC One Wales am 22:40 heno.

Getty ImagesCopyright: Getty Images

Ar S4C ar 1 Mawrth mae rhaglen yn dilyn y digrifwr a'r canwr, Dewi Pws sydd ar daith arbennig i sgwrsio gyda nifer o bobl sydd â rhesymau gwahanol dros gael tatŵs.

Un o'r rhai fydd yn ymddangos ar y rhaglen Taith Tatŵ Dewi Pws ydy Sarah Tyler Davies o Gaernarfon, ac bu hi'n siarad gyda Cymru Fyw i drafod y diwrnod wnaeth arwain at ei phenderfyniad i gael tatŵ .

BBCCopyright: BBC