Imbabazi za Trump ku magambo y'urukozasoni

Donald Trump Uwufise ububasha kw’isanamu Reuters

Donald Trump, uharanira umwanya w'umukuru w'igihugu muri Amerika ku ruhande rw'aba Republican, yasabiye imbabazi amagambo y'urukozasoni yavuze ku bagore hashize imyaka 11.

Muri video yafashwe icyo gihe, Trump yumvikana yivuga ibigwi ku kuntu akorakora kandi akagerageza gusambanya abagore.

Muri iyo video hari aho yumvikana mu mvugo y'urukozasoni avuga ko yagerageje gusambanya umugore ufite umugabo ariko akamubera ibamba.

Yumvikana kandi anavuga ngo "ushobora gukora icyo ushaka cyose ku bagore iyo uri icyamamare."

Uwufise ububasha kw’isanamu Reuters
Image caption Hillary Clinton yahise yamagana ayo magambo ya Trump ku bagore

Ayo magambo yahise yamaganwa n'abayobozi bakuru b'ishyaka ry'aba Republican barimo umukuru w'inteko nshingamategeko, Paul Ryan, wavuze ko ayo magambo yamuteye isesemi.

Hillary Clinton, wo mu ishyaka ry'abademokarate bahatanira umwanya wo kuyobora Amerika, yamaganye ayo magambo ya Trump ku bagore.

Anyuze ku rubuga rwa Twitter, Madamu Clinton yavuze ko ari agahomamunwa maze asaba abanyamerika kudatora Trump ngo abayobore.

Mu itangazo Donald Trump yashyize ahagaragara asaba imbabazi, yijeje abanyamerika kuba umugabo mwiza.

Yanashinje ariko Bill Clinton guhohotera abagore.

Anashinja kandi Hillary Clinton bahanganye guhohotera no gukoza isoni abagore bahohotewe n'umugabo we.