Imisozi y'ibirunga ibara ingagi 1000

Icyana c'ingagi kiri kuvurwa mu karere ka Musanze Uwufise ububasha kw’isanamu Getty Images
Image caption Icyana c'ingagi kiri kuvurwa mu karere ka Musanze

Umuryango Diana Fossey Foundation, rivuga ko akarere k'imisozi y'ibirunga kabarura ingagi 1000. Ziyongereye bivuye ku mutekano ziyumva mo, no ku migambi ihamye yo kurengera izi nyamaswa.

Iri tangazo ritanga inkuru nziza nziza ku barengera izi nyamaswa zikunzwe cyane.

Mu umwaka ushize, akarere k'imisozi y'ibirunga kabaruraga ingagi 604.

Nyamara zari mu zibarirwa ku rutonde rw'izishobora gukendera .

Mu mwaka wa 2010, ingagi muri aka gace zabarurwaga muri 480, bivuze ko zimaze kwiyongeraho izigera 124.

Hiyongereyeho izigera kuri 400 zibarizwa muri Pariki y'umutamenwa ya Bwindi muri Uganda.

Ingagi zose ziri mu karere zirasaga 1000.

Izi ngagi ngo zibarirwa mu miryango 36 ndetse n'ingabo 14 ziba ukwazo.

Ikigega Diana Fossey kivuga ko, ubu bwiyongere bwavuye ku mutekano ingagi zifite.

Ziwukesha ingamba zashyizweho zigamije kuzibungabunga.

Uyu muryango Diana Fossey Foundation wongera ko, habayeho ibikorwa by'ubuvuzi butita ku mipaka bugamije kwita kuri izi ngagi mu gihe zarwaye.

Uwufise ububasha kw’isanamu Getty Images
Image caption Uko umwaka ushize, ibihumbi by'ingenzi bagendera imisozi y'ibirunga

Ikindi ngo ibihugu bisangiye ibyanya izi ngagi zirimo byahuje politiki zigamije kuzirinda.

Ndetse iyo migambi ituma, hari n'ingamba zituma zidakomeza kuvogerwa n'abaturage begereye pariki.

Mu Rwanda, ingagi ni inyamaswa yubashywe bikomeye kuko ifatuye runini ubukerarugendo bw'igihugu.

Buri mwaka haba umuhango wo kwita amazina ingagi, umuhango uhuruza rimwe na rimwe ibihangange byo hirya no hino ku isi.

Ikigo cy'igihugu cy'iterambere RDB kivuga ko Pariki y'ibirunga iza ku isonga y'izisurwa n'abanyamahanga.

RDB yongeraho ko iyo pariki iza mbere mu musaruro winjira mu kigega cya Leta.

Umwaka ushize, ubutegetsi bw'U Rwanda bwahanitse bigaragara ibiciro byo gusura ingagi .

Igiciro cyari ku madolari 750 ku munyamahanga uzisuye cyakubwe kabiri aba 1500.

Aya kandi akaba ari na yo agomba kwishyuzwa n'umunyagihugu wifuje gusura ingagi.

Gusa urebye amikora y'Abanyarwanda si benshi bakwigondera iki giciro.