Umunyamakuru Phocas Ndayizera na 12 baregwa hamwe bazaguma bafunze

Umucamanza yavuze ko Phocas Ndayizera yemera icyaha
Image caption Umucamanza yavuze ko Phocas Ndayizera yemera icyaha

Urukiko rw'ibanze rwa Nyarugenge rwategetse ko umunyamakuru Phocas Ndayizera akomeza gufungwa mu gihe iperereza rikomeza ku byaha by'iterabwoba akurikiranyweho.

Phocas Ndayizera n'abo baregwa hamwe uko ari 12 binjiye mu rukiko baziritse amapingu, bambaye kambambili.

Bwabaye ubwa mbere abantu bemererwa kwinjira mu rukiko kuko urubanza rwaburanishijwe mu muhezo ukomeye.

Umucamanza yavuze ko Phocas Ndayizera na bagenzi be bemereye urukiko ko baburana bemera icyaha kandi ko basaba imbabazi zo kuba baremeye gushukwa.

Kuri Ndayizera, ngo yemereye urukiko ko yagiranye ubwumvikane n'uwitwa Ntamuhanga Cassien uherutse gutoroka gereza mu Rwanda.

Ubushinjacyaha bwemeza ko yahise yinjira mu ishyaka rya RNC rirwanya ubutegetsi bw'u Rwanda.

Ubushinjacyaha ngo bwabwiye urukiko ko Ndayizera aziranye na Ntamuhanga kuva mu bwana kuko bakomoka hamwe kandi bakaba bariganye no mu mashuri abanza.

Uyu mubano ngo ni na wo watumye aba bombi bumvikana ku mugambi wo guhungabanya umutekano w'igihugu.

Gusenya ibikorwa remezo

Ubushinjacyaha buvuga ko Ntamuhanga yari yasabye Ndayizera kumushakira uburyo bwo gusenya ibikorwa remezo hakoreshejwe intambi ariko hakifashishwa telefoni ngendanwa.

Ibikorwa byagombaga kwibasirwa ngo ni ibigega bya essence, inkingi z'amashanyarazi ndetse n'inyubako z'ibigo bya Leta.

Ubushinjacyaha buvuga ko uregwa yemeye kwinjira mu mugambi ndetse aniyambaza umuhanga wari kumufasha kubigeraho ndetse n'itsinda ry'abasore bari kugenda bashakisha ibikorwa bigomba gusenywa.

Bamwe mu basore ngo bari no kujya mu gisirikare cyiswe icya Ntamuhanga bagombaga kwinjirira mu gihugu cy'igituranyi.

Ibyaha bikomeye

Umucamanza yavuze ko abaregwa bemera ibyaha bakoze, bagashimangira ko bashutswe mbere yo gusaba imbabazi.

Gusa ngo urukiko rusanga baregwa ibyaha by'ubugome bikomeye byatuma batemererwa kurekurwa ngo bakomeze kuburana bari hanze.

Ngo hariho impungenge z'uko abaregwa batoroka cyangwa bagakomeza umugambi bari baratangiye, dore ko hari na bimwe mu bikoresho bafatanywe.

Nk'uko byifujwe n'ubushinjacyaha abaregwa bagomba kuguma muri gereza, urubanza rukazaba bafunze.

Hashize ukwezi Phocas Ndayizera atawe muri yombi, akaba yabanje kuburirwa irengero mu gihe kingana n'iminsi 7 mbere y'uko ubugenzacyaha bumugaragaza buvuga ko bumurega iterabwoba.

Uku ni na ko byagendekeye bagenzi be 12; bamwe mu bo mu miryango y'abaregwa bari mu rukiko bavugaga ko iyi ibaye inshuro ya mbere babona ababo nyuma y'iminsi 30 bababuriye irengero.

Ibindi bisa n’ibi